قلنا السلام ...
عندي برشة ما كتبتش حرف علحيط ، الله غالب القراية مفشختني والإلهام عندو مدة ما طلش ... هاني رجعت نحكي ليوم على حكاية نحب من خلالها نكرم شخص ...
ليوم، كيما كل يوم قمت عالفجر والدنيا مازلت ليل ومشيت باش ناخذ الترينو ونعمل أكل الرحلة كيما ...أغلبية الشعب الكريم
طلعت ، شديت بلاصتي في البريمة المكيفة (تكييف طبيعي) ، وقعدت نستمتع بهاكل النسمة ، حتى هيا الدنيا سخانة ، تقول غرغور القايلة في أوسو .
... ما عليناش
... وأنا هكاكة عين مسكرة وعين مغمضة
وتفيقني زنس عيطة القضا !
... حتى هكلي كانو قاعدين قدامي يحكيو عالكورة تفجعو و سكتو. غزرت ورايا بش نشوف شنية الحكاية، .لقيت ولد صغير ، مسكين معاق ذهني ، أهوكة ساعات لا طاحوا لا دزوه يسيب صيحة باهية
وقعد هاكل الطفل ثنية كاملة وهو يعاود في برشة أسامي وضربة ضربتين يعطيها صيحة ترجع الترينو عالسكة ...
وزيد أنا ماشي نعدي ثمنية سوايع كرفي ، في معهد عالي موش لازم نذكرو اسمو حفاظاً على السرية ومراعاةً لأصحاب القلوب الضعيفة ...
ما نكذبش عليكم ومن غير تنوفيق، هكل الطفل رغم إعاقتو ألي ماعندو فيها حتى ذنب ، نرفزني وطلعلي الكلبة بنت الكلب لراسي ...
وليت نقعد نقعد ونتلفت نقحرلو ، قلت بالكشي ينفع ...
عاد هكاكة على تلفيتي ريت مرا قاعدة بحذاه ، يعيطلها "أمي" .وهي تلحلح وتعاود " يزي عيش والدي معادش تعمل هكة" "صحيت عيش ولدي" " شو تاتا " ...
المرى بالها واسع ما تسمع منها كان الكلمة الباهية ، وصوت الصطاكة والضرب لا ...
قلت ... سبحان ربي ، توا أنا نصيف ساعة برك ... كان نلقى نلوح روحي مالشباك ...
وهي ؟
... كل يوم كل يوم تهز فيه وتجيب
تفطر فيه الله أعلم بأي معجزة
... تبات متحيرة عليه لايفيقلها عقاب الليل
...وبالها واسع ،وكيف كان أصغر من هكة مهمتها كانت أصعب
... وكيف يكبر مزالت باش تتلها بيه
...متئكد إلي بالها ديمة واسع
... نحب نكرم هل مرى
...نحب نكرم كل أم عايشة كيفها
... نحب نكرم كل أم
نحب نكرم أمي إلي من غيرها مستحيل كان نجم نكتب حرف من هالتدوينة ،
إلي توا خمستاش سنا وهي تقومني مالنوم باش نمشي نقرا ، من المدرسة التحضيرية إلى المعهد التحضيري
... إلي كل ليلة من غير إنقطاع تجي تغطيني حتى كي تبدا مريضة
... إلي علمتني نقول لا
... إلي نغششها ساعاة وتسامح
... إلي كيف كل أم تنسى المجهود، والتضحيات ألي عملتهم
... تكريم إلى كل أم في كل بقعة عالأرض
وحتى كان فما أمهات في كوكب آخر ... في مجموعة شمسية أخرى ... تكريم لهن زادة ... ... تكريم للي تتسب فالستاد
... تكريم للي تتسب فالمعهد
... تكريم للي تتسب على قارعة الطريق
تكريم للوحيدة ألي تستحق لقب مناضلة
أمي ، أمك ، و أمو
7 commentaires:
ربي يقدرنا و نرجعولهم. اللي ما قاساتش برشا عانات
شكرا اللي شاركتنا ها اللحظة و الموقف
برافو
الأمّ كيف تسمع منك ها الكليمات يتمسح تعب سنين و يذوب كاينّو ما كانش
الحمد لله إلّى مازال شباب كيفك
Mashallah alik w ala osloubek. Merci pour ce beau post, je n'ai pas vu ma mère depuis 4 jours à cause du travail, merci de me gronder même si tu ne me connais pas du tout.
مرحبا بيكم :)
هذا أقل ما نجم نعطيه ...
en attendant l'année de la mère, je te souhaites une bonne continuation... :)
merci :))
Merci! wallah dmou3i hab6et!
Souhaib
Enregistrer un commentaire