نهار كيف غيرو

تقزقيز باب يكسر الكرايم حرمو مالكمالة متاع الحلمة ...
ضهرو وجعو من عشرة سوايع نوم ...
حس التلفون في يدو ... غزرلو بعين وحدة ... ماضي ساعة وسبعة ... شايحة، ميساج لربي لا ...
طارتلو...
دار مالشيرة الأخرى باش يكمل النومة ، باش يغطس في الحلمة وينسى كوشمار الدنيا ... سكر عينو ألي حلها...

تغرويط معدة يكسر الكرايم طيرلو شاهية النوم ... وذكرو اللي مالسلاطة متع البارح ما ذاقش قدمة خبز...
قام ...
مشى لبيت البانو ... طش وجهو بالماء ... غزر لشعرو ... جاتو الغصة ... عشرين سنا مازال ما عملهمش وشعرو معمل عالقلبة ... باش يمشي ويخليه ... عويمين اخرين ويوليو النكت اللي يفذلك بيهم على صلعة بوه يمشيو عليه...

هبطتو الجاذبية مالدروج...
كركروه ساقيه للكوجينة ...
صباح الخير ... يا فلانة اعملي قهوية وطلعهالي... وللى تعرفش كيفاه ، وقتاش الفطور ؟ ... أيا مالا موش لازمة القهوة ، حتى أن مسقم ...
طلع يزرب ...
حل الفايسبوك ... ثلاثة ميساجات ... زوز دوب ما غزرلهم ... والثالث كيف راه تبسم ...
اتكا عالكرسي وتنهد ... هز التلفون كتب كليمتين والضحكة على فمو، ورجعو وين كان.

أيا الفطووور ...
لاهي لاهي ... توا قمت مسقم ...
أيا عيش ولدي ... ياسر ضعفت ... وليت جلد على عظم عيش ولدي...
هبط لقى مرقة بطاطا ... وفي التلفزة تونس سبعة تحكي على الحوت الأزرق المرجاني ولا حاجة تشبه ...
أيا بين نارين أختار اللي أهدى ... كمل شطر صحنو ... شرب شغمتين ما ...
قام وخلا بوه وخوه يتعاركو على الدبوزة وامو تصيح باش تريضهم ... ما فطن به حد ... غسل يديه

ايجا كل غلة عيش ولدي ما كليت شي...
حمدله ...
ايجا كول ...
فك عاد .... حمدله حمدله

طلع يجري ...
ز التلفون ...ما لقى شي ... حل الفايسبوك ... 12 نتفكسيون على ستاتي كتبو قبل ما يهبط ... غزر للإسامي ... ما عجبو حتى واحد ...
قعد ...
قعد ...
حس التلفون يفبري ... شي ...
قعد ... قعد... فد... طارتلو ...

لبس كونفارس ... هز المفتاح ... خرج

قعد على حرف الشط...
سرح مع الموجة...
غزر لسيدي بوسعيد و خيط الدخان يطير فوقو...
رجعولو ذكريات سنين ... و تنهد تنهيدة شايب الخمسين...
و غطس في حلمة طويلة...
فيقو لون البحر... أزرق كيف لون عينيها... ضحك على روحو
غزر للسما يشكي لمولاه ...
لقى الأزرق يستنى فيه ...
سلم روحو للبحر و استسلم معا صوت ألما على السقالة..
هربت مالقطرة جيت تحت الميزاب ... كان قعدت راقد خير ...
غدوة نقول ... يزي ما تعذبت ... يزي ما كذبت ... ما عندي ما باش نخسر...
غزر وراه و قام ...
حط يدو في مكتوبو لمين جبد بورتابلو و عمل طلة ... غزر ل أخر ميساج بعثو ... قراه مرتين .. و زاد الثالثة ...
رجعو منين جاء...
....
ياااا تي شتعمل هوني؟ من قبيلة و نحنا نكلمو فيك و تليفونك مسكر !

ما فهم شي... غزر قادمو ... تفجع ....غزر وراه...غزر على امينو على إسارو
ما لقى ما يقول ....
شو لون البحر مابنو ليوم ....
هههه وه يتبدل لونو هو ؟ هاكا تسلم؟ ... تي هيا نعملو كراب
... أيا مالا خلي الجمعة إل جاية
شنوة الجمعة الجاية ؟
لا لا قلت هيا نمشيو علاش باش نخلي لجمعة الجاية
....
تي هيا فيسع ملا شمس...‬

شبينا ديما نصورو الشاب لابس مريول الجمعية، هازز شمروخ بيدو ، وكاس موش لازم نقول اش فيه بيدو لخرى ؟

.على سلامتكم

مو كيما تعرفو العام هذا سماوه ، سنة دولية للشباب ، الحقيقة مانحبش برشة التسميات هذوما على خاطر ببساطة ماعندهم حتى معنى ...
توا اش معناها تقولي سنة للشباب ؟ معناها الأعوام الأخرى ، إلي تعداو واللي جايين، للشياب ؟

وأهوكا الشباب نعطيوهم عويم يتفرهدو فيه باش يفكو علينا مالتخرنين ...
ماعيلناش ...
بما أني نصنف روحي مالشباب ، برى قلت خلي نعمل طلة فماش ما نلقى حدث باهي في "الحومة" هكا ولى هكا ينجم يهمني كشاب ...

شي !!!كان جلسات التبندير ، وأمسيات تحرير برقيات الشكر والثناء ،ودورات تكوينية في تطوير أساليب التصفيق ...

حتى ألي يغزر مالبرا والي ما ينتميش بصفة مباشرة للفئة الشابة ، يقولك ملا جيل طالع ، شي يبكي الحجر ، (هذا كان خلاوه يبكي)
وهذاك هوا إلي صاير لل أسف ، واللي تسألو يقولك يا حسرة على صغار بكري ... والشاب ليوم ١٠٠% مايع

لا !!! ..
نقولها ونزيد نقولها الشباب ماهمش هكا !! والصورة متع القفة والميوعة واللاوعي ما تعكسش حقيقتنا .
الشباب واعي وحتى كان نسبياً ، والوعي متاعو مش ماركة لا "تفتح باب الرتل قبل الوقوف" ولى "أرمي الأوساخ في الحاويات المخصصة"
شبينا ديما نصورو الشاب لابس مريول الجمعية، هازز شمروخ بيدو ، وكاس موش لازم نقول اش فيه بيدو لخرى ؟
شبي كل ما نجبدو نحكيو عالشباب نجبدو عالحرقة والكورة والتدخين والحكايات الفارغة أكهو ؟
علاش ما نحكيوش عالحقيقة كاملة ؟

ما فماش شباب فالاحزاب ؟

ما فماش شباب فالجمعيات الغير المتلونة ؟

مثلاً على ذكر الجمعيات نعرف ثلة من الأصدقاء الشباب ، الكلهم من الجنس اللطيف ، قالو علاش ما نعملوش جمعية خيرية موش لازم نذكر اسمها ؟
قالو
علاش ما نصرفوش حتى شوية عالعباد إلي دايرة بيهم الدنية ...
اش خير من إنو نصورو ضحكة على وجه صغير مريض ...
ها البنات معندهمش ميزانية ضخمة بما أنهم الكل يقراو ، أما قررو باش يبداو ، بالإمكانيات إلي عندهم ...
قررو باش يعاونو ولاد بلادهم، إلي في حاجة لعباد هكة... في حاجة لينا ، و إلي في أغلبية الحالات، نساتهم خزائن الدولة، باش ما نقولوش حاجة أخرى

قررو باش يبداو، وبداو ...

ووقتلي الشارع يسأل على الثلاثة مليارات ألي هداوهم للجمعيات الرياضة ، لشكون باش تمشي ، هوما يدورو في الشارع يشريو في الهدايا للأطفال المرضى بشوية عشرلافات لموهم من مصروفهم على حساب حاجات أخرى .

هذا نموذج وإلى مثال للشباب ليوم ، ما نكذبش ونقول الكلهم كيما هكا . وحتى كان يمثلوا أقلية لازم نحكي عليهم... لازمني ومن واجبي كشاب باش نحكي على شبان يعطيو درس في الوطنية ، في عصر ولات فيه تتباع وتتساوم ...
ها الشابات هاذم، كيفهم كيف برشة شباب اخرين ما إستسلموش للتهميش ... وبداو مسيرتهم على طريقتهم ، وساهموا وباش يزيدوا يساهموا في تلميع صورة الشاب كما يقولوها ، أما موش في المحافل الرياضية ولا قعدات المبايعة ...

كشاب نفرح نفتخر كي نسمع حاجة هكة ...
خاصةً كي تبدا في السنة الطبالة متاع الشباب ، باش تبدا أسورتيى هههه