Pages

mercredi 12 octobre 2011

الوصايا العشر لبناء مجتمع يحلو فيه العيش





نظرا لتردي الأوضاع ومزيد تفاقم الأزمات يوم بعد يوم، ولغاية الحفاظ على وحدة الأمة التونسية والعمل على ترسيخ مكانتها في المنطقة والعالم، قررنا  نحن شباب حركة عالحيط إرساء القواعد والوصايا اللتي سيقوم عليها المجتمع.

  1. كل تونسي عندو الحق يقول اش يحب* وقت اللي يحب وفين يحب.
    سياسة ، فن ، رياضة ، دين ، مجتمع ، علوم ، ثقافة... إلخ
     
  2. كل تونسي عندو الحق يوصل وينشر رايو بالطريقة اللي يحب عليها مدامت خالية من العنف والإكراه*.


    *الإكراه:هو إنو وقت اللي تجبر حد باش يعمل حاجة بالسيف عليه ... هنا الإكراه إنو تجبر حد (ماديا أو معنويا ) باش يسمع رايك (واللا يشوفو) وما تكونش عندو الإمكانية باش يتفاداه.  
  3. كل تونسي ما عجبوش كلام تونسي آخر ينجم :


             
          - يجبرو باش يصحح اللي قالو، إذا كان فما الدليل اللي هو يكذب.
                    - يجبرو باش يعتذر إذا سبو* واللا تدخلو في حياتو   الخاصة.
                    - يستعمل أوبسيون "بيناتنا فلسة"


    *الرأي : بين السب والإنتقاد.حكاية السب أو الشتم موضوع معقد وشاسع حيث أنو ما نجموش نعطيولهم تعريف عام لأن المسألة تتبدل من مجتمع إلى آخر ومن مقام إلى مقام آخر.  بالعربي نقولوا اللي ألسب هو وقت اللي تستعمل الفاض أو حركات متعارف عليها في المجتمع ترمز للإهانة وتكون موجهة لشخص أو موضوع ما بهدف الإهانة.
    وهنا الفرق بين الإنتقاد والسب بحيث أن تنجم تنتقد موضوع وتوصل تبدي نفس الراي دون اللجوء إلى ألسب والشتم.
    - ملاحظة :  التهكم مثلا (الساركازم) لا يعتبر سبا ويندرج ضمن مجال حرية التعبير.



      
  4. كل واحد إستعمل العنف المادي أو محاولة القيام بالعنف أو التهديد بالعنف يعزل عن البيئة اللي حاول يمارس فيها العنف هذاكة.( ألا في حالة الدفاع الشرعي) 
  5. كل تونسي عندو الحق يعمل ببدنو اللي يحب إذا كان ما يشكلش العمل اللي يقوم بيه خطر على توانسة اخرين.  
  6. كل تونسي عندو الحق يتنقل لوين يحب وبالطريقة اللي يحبها ووقت اللي يحب و يدخل للبلايص العمومية متع الجمهورية الكل. ( بما في ذالك الشطوط والغابات والصحاري والجبولات) 
  7. كل تونسي عندو الحق يوصل للمعلومة دون عوائق ويشمل هاذا، الإمكانية باش يحضر الدرس اللي يحب عليه  في الجامعة اللي يحب عليها مهما كان مستواه 
  8. كل تونسي عندو الحق يربح فلوس كيما يحب إذا ما كانش وراء الربح هاذا مضرة ليه وإلا لغيرو.
  9. هذه الوصايا العشر غير قابلة للمراجعة ألا في حالة مزيد تفعيل الحريات.
  10. كل تونسي يلقى هذه الوثيقة يلزمو ينشرها وله الأجر.
     

samedi 8 octobre 2011

الفزاعة.


يضهرلي الناس كل تعرفوها الفزاعة؟ أكلي تسمعو بيها وتعرفوا إلي هي فزاعة ومش باش تعرضكم حتى مرة ...
آنا مثلا المرة اللي فاتت مروح من الفاك في آخر العشية ... تي براسك ليل والجماعة الكل فصعو قبل بساعتين ( طالب نجيب .. أي نعم نجيب ). بحيث قعدت مروح وحدي في جنح الظلام ...
عاد آنا هكاكة وعرضتني فزاعة ! قالتلي : أيا هات البورتابل والفلوس ألي عندك الكل واللا تو تروح بخريطة المغرب الكبير في وجهك !
وآنا موني وليدها ونفهملها .. غزرت من هنا ... من هنا ... ثبت فيها مليح ... ياخي شلقت بيها فزاعة ... ياخي تو سيمبلومون حقرتها وكملت ثنيتي .. وهي ألحق الفزاعة ، ما كانتش من العاكسين ... دنقصت راسها ومشات ...

روحت للدار ، وصلني مايل ، حليتو ، نلقى رسالة تهديد بالقتل ، حليتها ... حليت الأونتيفيروس ... وعمتلو اناليز ... ياخي المرا ألي تتكلم قالت بالسوري " إنتبه أنها فزاعة "  .... هو كي تجي تشوف حتى آنا شلقت بيه فزاعة قبل حتى ما تقلي ... أي عاد فسختو وسكرت الكازي ... ومشيت رقدت قرير العين ...

قمت في الصباح مشيت نفطر ... حليت باكو الجي وشربت منو زوز كيسان وقمت ... عاد آنا هكاكة على قومتي ريت الدات ليميت دو كونسوماسيون على الباكو ... حكاية كيما 2 فيفري 2007 ... ههههه يحبو يعديوها عليا ياخي شلقت بيها فزاعة  .... وكملت كاس آخر عالفازة ومشيت فرحا مسرورا مطمئنا.

عديت شهيرين من زمان هكا ... من فزاعة لفزاعة ... نشلق بفزاعة ، تخرجلي فزاعة اخرى من الحيط  ... حتى لين نهار من النهارات جيت باش نقوم ياخي ما قمتش ... قلت أكيد فزاعة جديدة هاذي .. نلقى روحي نشق في الفلك وماشي للبرزخ الأعلى ... يا ملا أحوال ! ياسر رياليست الفزاعة متع المرة هاذي ! الجماعة يتحسنو !

*إنتبه هاذا المقال فزاعة.
** إنقر على الفزاعة تخرجلك فزاعة.
 
   

vendredi 7 octobre 2011

الرجوع لبلوغي !


 عالسلامة.
عندي أشهرة ما كتبتش حرف في البلوغ .. الواحد طارتلو مالكوارث اللي يشوف فيهم في العالم الإفتراضي والشارع ... بحيث حالة الإشمئزاز  والنفور تتقوا على كيانو وتخلقلو بلوكاج في التعبير ونوع مالتبهيمة ... زيدهم فازة الصنصرة الذاتية اللي ما كانتش عندي الحق،  ( ما يزيش حجب عمار وزيد نكملو عليه ؟ ) واللي ولات توا مسيطرة على الريشة كل ما يجيني الكيف باش نكتب ...
حاجات تخلي الواحد سلبي وبعيد، يستكفى بالفرجة والتعليق والتنبير..  ويقرب نوعا ما  لتركيبة الكائن القهوفيراجوي ( نسبة إلى قهوة الفيراج أو فيراج القهوة : وهو مكان مهيأ يحتوي يوم الأحد أثناء المباريات على كثافة عالية من المعلقين والنبارة في المتر المربع) بعد ما كان لمدة من زمان، ما يرضاش باش يقعد على دكة الإحتياط كي كانت الجمعية تكور على الطيوح ...

وهو يقول القايل، لواش التكوير توا وتكسير الكرايم؟ ماو وفا كل شيء وهانا نسيرو نحو تأسيسي المدينة الفاضلة بخطى ثابتة وبحماية كتائب الثوار ( واللي بالمناسبة، ما فهمتش علاش يحبو ها التيتر متع مدون وبلوغووور ويموتو عليه) ؟ سؤال صعيب آه !

الحاصيلو آنا توا رجعلي الكيف للتدوين والدوانة... وراجع راجع لبلوغي عبر الجبال !
وزيد ما نعرفش علاش كتبت التدوينة هاذي ... ممكن نطلع في المورال لروحي هههه
وفي الآخر الواحد ما يقول كان ، الرجوع لبلوغي !