حان الوقت لكي نستفيق.

أيا عالسلامة،
نهار السبت اللي فات عالصباح ما لقيت ما نعمل، قلت برا نمشي نعمل قهوة. دخلت ما لقيت حد، طلبت أكسبراس وتلفتت للتلفيزيون. واحد مالناس مانيش مغروم بيه وما نتفرج فيه كان في حاجة بالذمة. ..
الحاصل نلقى شان مصرية تعدي في مسلسل مكرز.. بدل على مازمبي ها الرداءة . بدلت وبديت نمشي بالشان بالشان ومع كل شان نخرج نفحات من الإيمان.
ويقول القايل آنا علاش طايرتلي ؟

مو مع كل شان نبدلها نلقى لحية محنية مستنصبة فوق بيرو ولابسة منديلة متع بيت فطور وتفتي وحدها على دين، على طب، على فلسفة، على علوم، على سياسة.. والعباد تطلب وتستفسر وتستفتي والمدبية تجاوب وتوجه وتنهي وتأمر... مشاهد وأقوال تثلج الصدور فمتلا!
وهو ساعات الواحد يقول علاش الواحد يستغرب برشة ؟ تي هو حتى عبد الرزاق الشابي وسمير الوافي عندهم جمهورهم هههه.

الفازة، أنو قعدت نبدل قريب خمسين شان فماش ما نلقى حاجة ننجم نتفرج فيها من غير ما نخرج مالملة ، وشيء! الكلهم ( ونسطر تحتها 14 مرة ) الكلهم نفس التوجه ونفس الديكور ونفس الللحي ونفس التحليل والتحريم ومنديلة بيت الفطور!

إيه وفين المشكل في هاذا الكل ؟ مو حرية التعبير!
المشكل اللي ما فما حتى شان تفرهد عالقلب يا مازمبي!!
خمسين واللى ستين شان من السنة اللحي اللي يفتيو، إلى الشيعة اللي يندبو، مرورا بقنوات تعدي في القرآن ( إيه نعم ) وتبيع في كريم تكبير الثدي والخصيتين!! فبحيث ما خرجناش مالتكبيرهههه!

ماللخر خذيت ثاني أكبر شوك  بعد الثورة ( الأول خذيتو كي سمعت اللي حزب النهضة يقول على روحو مدني هههه) وقعدت باهت واستسلمت ورجعت المسلسل المصري المكرز! 



بلوغة أكثر جدية ووضوح، نكونو بهايم ياسر وعمي كي نشوفو مظاهر التخلف والرجعية والتصحر الفكري في المجتمع ونقولو " فين كنتو" و "من أنتم"...
العباد هاذي تخدم في خدمة رهيبة عندها سنين، بروباغندا ومحاصرة لصيقة بوها كلب للمواطن العادي من الشهار المحافظ للبطال المراهق الزبراط، اللي بعاد على أوساط النخبة.
ما يهمنيش مصادر التمويل والأجندات، الواضح والأهم أنو الخطاب قاعد يمس في شراح كبيرة عندو مدة ( حكيت عالمضاهر هاذي في نفس المدونة قبل بعامين) ، شكون منا ما
يتذكرش مثلا قرص "عذاب القبر".

في المقابل،في الفترة السابقة، متبني الفكر التقدمي والإنساني والعلماني والمجددين في الدين ، من مثقفين وأدباء وجمعيات خانسين ومكتفين بالنشر والنشاط في وسط مدرجات الجامعات المغلقة واللى في كتب ما يوصلوش للعموم.
والشيء هذا عندو تفسيرين : يا أما السلطة تعمل على تعطيل وصول المعلومة للمواطن البسيط لأنها في صدام مع الفكر لأن الإرتفاع بوعي المواطن يهددها، أو لأن المفكر بيدو مطمان على "التقدمية" و "العلمانية" اللي الدولة نصبت روحها مدافعة عليهم.
وفي الواقع التونسي قبل "الثورة"  المثالين الزوز موجودين الحقيقة ( هنا استعمال كلمة "الثورة" فقط للضرورة الشعرية لا غير هههه )

نحب نقول اللي المحافظين ( خاصة الشق المتطرف جدااااا) يتصرفو بعقلية "تقدمية"، بحيث يحاولو "يتقدمو" بالمجتمع ( نحو  الخلف ) بالنشاط والثوران وال"العنف" والطموح متع التقدميين.
في المقابل التقدميين يتصرفو بعقلية محافظة ويحاولو يحافظو على على تركيبة المجتمع أكثر من أنهم يحاولو يبدلوها، بالخضوع والكسل وموقع الدفاع متع المحافظين.


مختصر الهدرة، الواحد لازم ساعات ياكل كف باش يفيق ( تي هي "الثورة" قامت بعد كف). ونحن من كف لكف من " خيبر خيبر يا يهود" ، لأفريكارت ، للإنتخابات، لمنوبة، للإعتداءات على الصحافيين والمثقفين لسجنانستان!
حان الوقت لكي نستفيق!
بالفلاقي! نرجعو نحتلو الشوارع والقهاوي والجامعات والستادات والجوامع كان لزم!
بالتاغ على الحيوط، بالمنشورات في الترينو في المترو في الكار في التاكسي، قدام الفاك، قدام الليسا، في الكوشة في الفيراج في القهاوي / الصالون متع التاي في الحجام/ الحجامة. بالخطب بين العباد في الأماكن العامة، بتوزيع الكتب والسيديات، بالبروجيكسيون متع الأفلام في القهاوي والجامعات والشوارع والشطوط.
وخاصة بتكوين مجموعات متع صحاب وولاد حومة يحملو نفس المشروع ويعملو جماعيا الأمور هاذي الكل. وهاذا الكل ليوم موش غدوة!  

مالا آش تصلح طرف الحرية اللي قلعناها كان نقعدو نتفرجو فيها في كواترو! ونمارسوها في الفضاء الإفتراضي إفتراضيا!!
جاء الوقت باش نهبطو للميدان بقوة ! حتى بالآنونيما!

وكيما يقول الخليفة السادس غير ربع :" مسؤوليتنا كبيرة يا وخياني" قدام التاريخ والأمة التونسية !

وتوا أنستو ماشي نفرق المقال هاذا في القهوة. 

موش متاعنا

السلام عليكم ورحمة الله وبركاته، السلام عليكم ورحمة الله وبركاته، السلام عليكم ورحمة الله وبركاته.

أردت إن  استهل هذه  التدوينة بتحية دسمة تفيض إيمانا (متع الهوية الكل)، اقتداء بولي أمرنا ومحرر شعبنا وقائد جيوشنا الفذ، صاحب الحرب والسلام ( قعدت نولجو على حكاية ما لقيتلو كان هاذي) ،صديق الصحافة والإعلام، محرر الجارية والغلام.
أما بعد ، إسمحولي إن استعمل لغتي التونسية الدخيلة على ثقافتكم لكي تفقه كلامي اقلية من شعبي الكريم.

بحيث حبيت نستهل هاذا العام بشوية خنن مع السلطة ومع ولي أمرنا، موش هكاكة وانما لغاية في نفس يعقوب ( سي ديجا يعقوب موش إسم عربي مسلم ).
البارح حليت التلفيزيون، عفوا "صندوق العجب"، ولقيت سيدنا ولي الأمر متألقا بطلعته البهية ، لابس البرنوس وحاقر الشاشية، يهني فينا براس السنة الميلادية ... قلت أكيد راهو سها واللى نسا وللى عندو مشكلة نفسية، كيفاش يهنينا بحفلة صليبية و بتقويم غريغوري ؟
ثم تهنيت وتنفست الصعداء وأطمأن قلبي ورجع لرواريا الهواء، كي سمعتو قال " الشيء هذا موش من تقاليدنا والعيد هاذا موش عيدنا".

شكرا لرئيسنا العظيم، على هاذا الرأي السديد والقول الحكيم، أما اسمحلي باش نزيدك شوية نصائح عملا بمقولة هي في تقاليدنا: " قالوا تعرفش العلم، قالوا نزيد فيه"
بحيث يعجبني فيك تشبثك بقواعد الجدود والتقاليد الحنيفة أما يقلقني نسيانك لأهم الأشياء اللي تقوم بيها عن غير قصد ... نعرف غلطوك.

بادئ ذي بدء يا سيدنا ويا ولي أمرنا وانا واحد من "مواطنيك" ما يحبلك كان الخير، كي تبدى تحكي على تقاليد عربية إسلامية وتمجد فيها وتنفي الحضارات الأخرى وتقزمها، من الأساسي أنك تعطي لمظهرك -وهو أول حاجة يشوفها المتلقي- الإطار المتوافق مع كلامك... حبيت نقول يا سيدنا ، هبط البرنوس من على أكتافك راهو موش متاعنا نحن العرب المسلمين... راهو متع البربر والعياذ بالله!

ثانيا يا سيادة الرئيس حبيت نقول اللي نشرة الأنباء اللي ضهرت فيها - متع الثمنية متع العشية- انما هي من إبداع الثقافة الغربية، وأنا نقترح يا سيدنا تردها أثر صلاة المغرب، هكاكة تتناسب مع طبيعتنا الثقافية وانتمائنا الديني ونقترح يكون الجينيريك متاعها على أنغام مقام الحجاز (غير إن في الموسيقى هناك إختلاف حول جوازها من عدمه بن علماء المسلمين). ولكن يقعد هناك مشكل - اسمحلي بش نوصفو بالطفيف- حيث إن جهاز التلفزيون والكمراوات والاستوديو واجهزة البث والالتقاط ، الكلها إنتاج غربي صليبي ملحد نابع من ثورة صناعية ثم تكنلوجية غربية وغريبة ومعادية لثقافتنا.
وهنا موش مشكل، نقترح يا سيدنا تولي تقدم خطاباتك في قصر قرطاج تحت الزيتونة، ويحضر الخطاب جحافل من "مواطنيك" و"مواطناتك " الرعايا ، كان قد قدمو إليك بقوافل من الإبل والخيول العربية الأصيلة.
ولكن تقعد مشيكلة صغيرة، قرطاج موش من حضارتنا وموش من ثقافتنا ، نقترح نمحعيوها واللى نبدلو اسمها " مقام ولي الأمر" واللى تنتقل للسكنة في القيروان بعد إن تقضي على كل مظاهر الثقافة الغربية الوجودة فيها ، إبتداء بالمصانع وحتى بلاكات "كوكا كولا" ( كان خلاك ولد الليبرمان ).

ثالثا يا سيدنا، آنا لحد الآن ورغم إيماني برجاحة عقلك وايمانك وتدينك القوي، لتوا باهت كيفاش تشارك في إنتخابات هي دخيلة على تقاليدنا وثقافتنا العربية الإسلامية.
وكيفاش تحكي على ديمقراطية هي بعيدة كل البعد عن ثقافتنا وتاريخنا العربي الإسلامي ... يا سيدنا، اترضى بمحو الخلافة وهي من صميم هويتنا على خاطر آخر خلفائنا زين العابدين بن علي ما طلعش في المستوى ؟ ( ولو أنو ما بعدش بالكل عن التقاليد العربية الإسلامية في الحكم)

ثم يا سيدنا مذا تقصد بمدنية ؟ هل نسبة إلى المدينة ويثرب أو أنك تقلد الغرب ؟

ما نعرفش آش نقول يا سيدنا في ختام مدونتي سوى أن أنصحك أن تراجع نفسك نحو مزيد تثبيت هويتنا ولا تخجل !

وأرجوك مزيد من السرعة قبل إن يتنهي حكمك المؤقت يا سيدنا !




  

برا قيد واللا برا عدي

تي شنوا تاوا آش مزال فيها ؟
مزلت متردد ؟ ... لا انتي بيك حاجة وربي يسترك ...
قلبك ما يحسش ؟
ما عندكش شعور ؟
كون مام ، حتى كان مطيرتهالك السياسة كيفي فما حاجات

يرجعولك شاهد العقل كيما هكا ...
إذا من غير ما نطول عليك ، أختي المواطنة أنسجي على منوال الأخت الفاضلة ، أخي المواطن ، برا قيد سينون برا عدي!

15 جويلية 2011

ليوم ستة شهر على هروب بن علي وبداية سقوط جزء من نظامو ، مشيت بش نقيد في قائمة الناخبين ، باش في أكتوبر (كان سهل ربي) نمارس حقي أول مرة.
هزيت معايا الوالدة اللي عمرها ما انتخبت قبل ومشينا قيدنا .. الحكاية ما شدتناش درج بالحساب ، خلافا للأكاذيب (واللى الله أعلم شنية) الموجودة في الفايسبوك بكثرة.
 

 ليوم زادة صادف فما إعتصام في القصبة ، اللي يقولولو القصبة ثلاثة ، واللي مانيش معاه ومانيش مساندو ونعتبرو خصوصا يخدم مصالح حزب النهضة السلفي الطامع في الكراسي ، في المطلب الأول متاعو.
 بالنسبة للمطالب الأخرين فيهم اللي ياسر مثاليين وشعبويين، وخاصة لازمهم وقت طويل ياسر باش يتحققو موش متع واحد يعتصم ويقعد يستنى حتى يجيوه .  كيما "إستقلالية القضاء  واللا " لا ...لوصاية أجنبية"
على كل ، العباد عندهم ألحق يدافعو على أرائهم وعندهم ألحق حتى يدافعو على احزابهم كان لزم وواللا جيست يعاندو في الريق متاع المصاروة زادة كيف كيف عندهم ألحق ...

حليت الفايسبوك وكي العادة نلقى الدنيا خايضة : هاو ضربوهم بالغاز ... هاو هربو تخباو
في الجامع ... هاو خلطو عليهم غادي وفشخوهم ... إلخ
بالطبيعة اللي صار ماهوش مفاجأة ، تي هو مطلب من مطالب الإعتصام "إقالة وزير الداخلية " ...حاجة متوقعة باش نشوفو نفس ممارسات ها المنظمة البوليسية اللي من أكثر المنظمات شراسة وخبرة في القمع في العالم ... الشيء موش باش يتبدل في ليلة وضحاها وخاصة مع إنعدام الرغبة السياسية واللى القدرة على التغيير ...
،وعلى ذكر الجامع، البوليس التونسي  لا دين لا ملة ، لا يهمو في جامع ولا طبرنة ولا حانوت كفتاجي ...الكل على بعضو ... إذا زايد باش الواحد يستثمر حكاية الجامع للتأثير .. المسألة  قبل كل شي"  "مسألة "حرمة جسد" قبل ما تكون حرمة مسجد "

في الأخر حبيت نقول اللي آنا ديما ضد ها الإعتصام خاصة وأني نفضل نضرب ضربتي  نهار 23 أكتوبر ... ومانيش باش نبدل رايي للتعاطف ... ولكني مستعد ولازمني  نتظاهر بش يفرجو عاللي شدوهم بمجرد أنهم عبرو على رايهم و ضد ها البولسية الهوايش ووزيرهم اللي حاسين رواحهم في موقع قوة وقاعدين كل  مرة يزيدو في تطيح القدر. 

فهمتها كيفاش ؟

البارح ، وآنا مروح من بياع البمبلوني في الليل ، قعدت على حرف الشط نشم في نسيم الحرية ... عاد آنا هكاكة ونرا في زوز ولاد ماشين ويحكيو نرمال ... غزر الأول للثاني وعطاه زنس داودي يعمل 66 كيف وقالوا " فهمتها كيفاش" غزرلو الثاني وقالوا " آه صار هي هكا " وتبسملو ... وكملو ثنيتهم نورومال ...
( بون صحيح نفلم ، أما ما لقيتش دخلة للتدوينة وزيد عندي قريب الشهرين ما كتبتش ، وأون بليس ، كيما يقول الرومي "سا بو أريفي" )
عاد ها المشهد هذا ذكرني في حال الثورة ، اللي مجرد ذكر اسمها وللا يجيبلي الإحباط والإشمئزاز والإستفهام والفشلة وحب الشباب إلخ ...

مو نورمالمون وعلى حسب ما فهمت، نهار صبعتاش وحتى قبل، في إنتفاضة الحوض المنجمي ، العباد كانو راقدين ويضربو في النوم وغاطسين شوشة في الحرية كيما يقول الشاعر بندير مان ، كانو مڨيلين ، عملو هكا قامو قالو ، أيا مدام عيشتنا ليكس ، أيا شقولكم كان ننوعو شوية ونعملو دولة الخلافة وجو ؟
 "يا قتادة برا عيش بني جيبلي زوز سناجق مالزاوية وتعدى "للمتشوقة للعيد الصغير" جيب من عندها 25 شمعة ! ... لا لا مش عيدملاد خوك ! برا خللي نعملو الخلافة يهديك النهار راح وخليت الفطور عالكانون ! تي علاش هازز معاك خيمة ؟ لبسها نقاب يزي أختك ، ما فماش شمس قوية ليوم ! وزيد يظهر نهار موش متع فتنة !"

أي عاد مو شلقو بيهم البوليسية أعداء الخلافة ولحمت في الرديف وما سمع حد ... تي حتى الفايسبوك كذب وقال تشغيل وفسفاط واللا شنوة ... تي ياخي عنا مشكلة في التشغيل نحنا ؟ الحل في الإسلام ودولة الخلافة ونعملو بنك الياجورة وبنك ال- صبلي خلي نحفل ، ليطمئن قلبي ...
ستنا عاد هاو جاك الحديث !

أمشي يا زمان ايجا يا زمان ... مرة مجموعة من الشباب النير المتقاعد ... مبنكين في قهوة شعبية صالون متع تاي في بن ڨردان ... عاد هوما أكاكة في رغد العيش ودخل واحد مالحدود يجري وسقيه أعلى من راسو ...
أكلي شكو فيه هوما شوية مالأول ، عيطلو الكبير فيهم ، أيا مرحبا بيك في بلادك ... وين كنت؟ شنوا أحوال الصغار ؟ ولدتشي المرى ... الحاصل سألوه شوية اسئلة روتينية مبعد عطاوه كوارتو وسيبوه ... عاد وهو ماشي ، طاحتلو من مكتوبو التيلاني بطاقة إشتراك متع تطبيع للكيان الصهيوني ... اهاه ! شنوا هاذا ؟ ومنين ليك ؟ طلعو وهبطوا معاه ضهرت الدولة في شخص المافيوزي المخلوع ، باعثتو يعمل في أنستالسيون متع كليماتيزور لواحد صهيوني في القدس المحتلة...
والبقية موكم تعرفوها عاد .. بن ڨردان قامت وما قعدت وقعدت خايضة أيامات !
آه مالا هكاكة هي ؟ مغرقينا في الحريات الفردية ومخمجينها بحرية التعبير والتحزب والإجتماع باش تغطيو التطبيع ؟ دويو !

وصلناشي لنهار صبعتاش ديسمبر ؟ شنية هي الحكاية بالضبط ؟ مو سي البوعزيزي الله -يحرمو وينعمو ويزيد يرحمو وينعمو- كان يلعب في رامي مع واحد قومي تونسي وياكلو في الفزدق وهو سي البوعزيزي كما نعرفو الكل قومي عربي ما يستعرف كان بالشعب العربي ... لا تونس ولا تزي وزو ... عربي كاميكاز سون بيتيا !
غزرلو القومي التونسي قالوا ، آنا هويتي تونسية ما تحكيلي شيء... والوحدة العربية متاعك  نفخها وإشرب ماها وزيد أون بليس أمي أمازغية وتتكلم بالشلحة وجدي تركي من إسطنبول وعندو معمل سباولو غادي بالأمارة !
عاد سي محمد طارتلو مالكلام الخطير هاذا! تي شنية ها البلاد قداش وللا فيها تسيب ! يوليش الواحد يعبر كيما يحب ؟؟ ياسر عطاوهم حرية ياسر ! تشكك في هوية شعب كامل يا بني آدم ؟ أنها الكارثة ! إنه الابوكاليبس ! وعمل هكا ، خرج كلونيا وان ميليون ، فشفش بيها على حوايجو وشعل البريكية وصار اللي صار ...

وبدات الثورة متاع الخلافة وعودة الإسلام .. آه لا ... بدات ثورة العروبة وإسترجاع الهوية ... بدات ثورة الائكية ... بدات ثورة الفصل الأول من الدستور! لا زادا ؟
ثورة شنية مالا ؟ ايجا لمقر الحزب تو نعطيك كسكروت ونقلك كيفاش ... وفي رواية اخرى برفان جاردور .. واللا فولارة متع فلسطين ... واللا درابو متع توليرونس ....

Politique? trop difficile pour moi.

tout ce qui est écrit dans ce billet peut être totalement faux. inutile de vous décrire l’état psychique de quelqu'un qui passera un concours d'entrée aux écoles d’ingénieurs sans même avoir prendre la peine d'assister aux examens au cours de l'année pour des raisons disons ... logistiques.  
faites semblant de ne pas remarquer les fautes de grammaire et d'orthographe, de toute façon je n'en ai rien à cirer !.

Aujourd'hui, presque cinq mois après un certain 14 janvier , date symbolique d'une révolution "Ré7ét'ha B Chrab"(1) comme disaient certains, je me suis levé d'un long cauchemar Algèbro-analytique(2) avec la conviction de n'y rien comprendre en politique (Tunisienne) ..

Ghaltouni.

Bon, j’avoue que c’est en grande partie de ma faute, fallait que je me renseigne avant! 
à aucun moment je ne pensais qu'il s'agissait de boxe quand on disait "Gauche" et "Droite", jusqu’à ce que le PDP et la Nahdha viennent éclairer ma lanterne.. 
J'ai pu voir aussi un Dieu(3) du Stade qui ne pose pas nu! il a même une barbe! oui ça existe... dans un Stade à la Mahdia ... Preuve que les cocktails explosifs: politique-religion-Sport, eh ben c'est Halal, et ça ne tue pas ... pas encore... 
mais y a certains points que je n'ai pas pu comprendre , et que je ne comprendrai sans doute jamais! parce que c'est classé politique, et que je suis nul en la matière.
 
1- Manifester contre les manifestants parce que les manifestations "Bch Ydakhlou El Bled fi 7it"(4)
2- Report des élections du 24 juillet au 16 Octobre : merde un hold-up sur la révolution ! on va tous mourir !!
2'-Report des élections du 24 juillet au 23 octobre : Sebssi, Sebssi cool! (applaudissements)
3-Non le terrorisme n'existe pas ... coupez-moi la tête de ce menteur(5)
4-non je ne fais pas partie du parti, mais ils connaissent mon nom, mon adresse aussi, et je leurs envoi 5% de mon salaire chaque mois ( d'ailleurs c'est eux qui paient mon salaire)
5- Une guerre tribale au Metlaoui : pas du tout! c'est un Complot! tout le monde est gentil tout le monde est beau sauf le RCD.

 Dima Sport.

Un autre truc qui vient renforcer ma certitude, le cas d'une page Facebook  qui, comme son nom l'indique, est spécialisée dans le sport...
depuis le 14, elle a fait sa propre révolution et guide désormais, le peuple vers la démocratie ...
je ne cache pas ma haine pour les clubs de foot (Le CSHL est bien plus qu'un club, c'est une religion(6) :p ) et je n'ai rien contre leurs fans, mais quand c'est à eux de me montrer la voie de la raison, le peu de QI qui me reste, me laisse penser que ce truc n'est pas du tout le mien!    

_______________
(1) Expression inventé par Quorbi pour dire que l'arbitre est bourré, Revue & Corrigée par I.Amri admin de la  célèbre page Tunisie.
(2) Moi aussi je sais pas ce que c'est.
(3) 3 * Takbiir à l'occasion de l'entrée de R.Ghachouchi au Stade
(4) Expression crée par les Qobba people alias majorité silencieuse "le pays va droit dans le mur" (c'est pour ça qu'elle doit rester silencieuse)
(5) appel au meurtre de I.Amri suite à (1), par des pages Facebook qui n'ont rien à voir avec le terrorisme.
(6) le mythe du 99.99 est faux ... j'attend un (5)' pour moi :)

 

دليل المحلل السياسي التونسي الممتاز في الفايسبوك

باش تولي وليدها في البوليتيك في تونس وكلمتك مسموعة ويوليو عندك أتباع وصحابة وتولي شخصية مأثرة في المجتمع الثنية طويلة وشاقة ولكنها تستحق التعب... باش تخدم البلاد بالطبيعة...

باش تبدى، من المستحسن يكون عندك ماضي نضالي معتبر وفيه إحتكاك ودراية بالجهاز القمعي... مثلا تكون مشجع ولد فيراج ...

تكون متشبع بالفكر السياسي ومضطلع في كل التوجهات السياسية والاديولوجية وموش البعض منها ... بمعنى آخر تتفرج في الجزيرة عالأقل مرتين في النهار وتكون عضو ناشط في بعض صفحات الفايسبوك القيمة .

لكن باش تنخرط فعلياً في المسيرة التوعوية والتثقيفية للمجتمع لازمك تملك وسائل معينة :

واب كام .

درابو تونس ،حتى كان تحصلت عليه في آخر إجتماع لجنة تنسيق ميسالش . المهم  لازم الواب كام تصورو وراك ، سنون ما عملنا شيء .

صفحة فايسبوك : أختارلها أتفه أسم تلقاه ... إسم متع بوكيمون مثلا .

مرايات شمس (الحقيقة مازلت ما نعرفش حكمتها ).

كي تقعد قدام الكام وتبدى باش تلقي خطابك تذكر حاجتين .

الحاجة الأولى : إجبد عبد معروف واللى حتى رأي فيه إختلاف، ومرمد والديه بالسبان ولفقلو شبعة تهم باش يجي شكون يرد عليك وهكاكة تلقا موضوع للفيديو متاعك الجاي بش ترد عليه بدورك وهكذا  ...   

الحاجة الثانية والأهم : مهما كنت بهيم ، كي تبدى وراء كاميرا لازم باش تلقى شكون أبهم منك يساند فيك ويصفقلك وهاذي حقيقة عامة وعصر زعبع والقذافي يشهدو بهذا .

شكراً عالمتابعة والإهتمام ودمت ذخرا لهذا الوطن. 

مونتاليتي بسيكو آم

في المدة الأخيرة كثر الكلام على العلمانية في تونس في الفايسبوك وفي الإعلام السمعي البصري ...
مانيش باش نعطي رايي في الموضوع لأنو بالنسبة ليا المبدء هاذا (علمانية الدولة ) مبدء أساسي كيفو كيف الديمقراطية  واللي عندو ما يقول ولى يحب يزيد يفهم ما عليه كان يرجع للمراجع الأصل وينقص من القيل والقال .
موش هاذا الموضوع ...

مع توسع النقاش (اللي ماهوش عقيم حتى طرف ) ومنذ إندلاع الثورة ، ضهرت حكاية جديدة
الحكاية اللي حبيت نحكي عليها هي إنتشار البسيكو آمية أو البسيكو أمية  (نسبة إلى بسيكو آم والأمية عفانا وعافاكم الله  ) في صفوف الشباب (واللي أقل شبوبية زادة ) ...
شمعناها تكون بسيكو أمي ؟
معناها تكون مازلت في الليسي ولى حتى متخرج من جامعة وتتيقن أنك ملكت الحقيقة ، الحقيقة الكاملة ، إقتصاد ، سياسة ، دين ، فلسفة ، علم النفس علم الإجتماع ، تاريخ ، خربقة ، بيس ، زربوط ، علم النفة ... منين يدوروك تدور تبارك الله .
أي ومنين جبتو ها العلم، عيني ما تضرك  ؟
"تفرجت فيه في فيديو بالطبيعة ، غناية راب ، خطبة شيخ "عالم" ، مقال كتبو الشيخ تحيفة  إلخ إلخ ...  " ما حاجتيش باش نشوف المصدر !
باهي يعطيك الصحة على رايك ... هاك وصلت فكرتك نجم نتكلم ؟
 "رايي ؟؟؟ يا ولدي شبيك ؟ هاذا راهو الصحيح ! هاذي الحقيقة ! هذا علم اليقين! هذا الوحي المنزل ! هذا نور ألحق ... هاليلويا !! وانتي شبيك تناقش في الحقيقة ؟ شنوا  مازالت ما عندك تقول بعد ها الكلام ؟"
ومبعد يبدا نسق التكفير التصاعدي :
"1-ربي يهديك !
2-ما تعرفش ربي شقال ؟
3-يا شاذ يا حيوان يا شلاكة يا عميل الغرب يا تجمع،  كيفاش تناقش ؟
4-يا كافر.  "

للأسف غلطت مرتين وللى ثلاثة ودخلت في نقاش متخلف مع مجموعة من المراهقين فكرياً وعفت روحي وخرجت كافر وملحد وصهيوني (الكوكتال هاذا كان يسمعو عصام جمعة تو يمركي بونتو بالضحك ).
مختصر الهدرة ، قاطعو النقاش مع ها المراهقين وخليولهم الوقت للنضج .
ونصيحة لأي متبني للفكر البسيكو أمي : كان تعديت من هنا ، قبل ما تتكرم علينا بكلامك العسل ، أعمل مزية على مخك ، أعطيه قيمتو وحل كتاب ... لا زوز . وللى كي قدر عليك ربي ، تعلم أنك كي تعطي راي ما تلزمش بيه غيرك وماتفرضوش بالقوة ، بأي حجة كانت ! حتى كان هبط عليك الوحي الإلاهي !
على خاطر ما عندك وين توصل بمنطق العنف .

ومن هنا حتى ترجع البطولة الوطنية المحترفة وكل بصة تشد أختها ، ربي يكون في العون .

        

النهضة ، من الهولوكوست إلى السلطة

ما حبيتش ندخل في الموضوع مالإول ، قلت ها النوع مالإفكار ينجم يكون سلبي أكثر مللي يجيب حاجة جديدة ، خاصةً في الوضع الصعيب شوية اللي نعيشو فيه ...
أما موش مشكل ، خلي الواحد يعبر شوية وبڨلة ليها ...

مو سيدنا الشيخ راشد الغنوشي روح من بلاد الفرنجة وأستقبلوه في المطار بالألاف ...
جموع يغنيو "طلع البدر علينا" وأجواء إحتفالية وتقطيع لحي ويدين خارجين من تحت النقاب يحبو عالأتوغراف مع معشوق الجماهير... وكان جات الفوفوسيلا موش حرام راهو خرجوها عملو بيها فيستيفال ...
المشكل موش هوني، وموش في الغنوشي وللى بعض القيادات  وللى بالأحرى موش هوني فقط ...

على خاطر لحقيقة كي سمعتهم يغنيو طلع البدر ، قلت علأقل بالبهامة هاذي، جماعة النهضة ، ما ينجمو يلمو كان الفين صوت في الإنتخابات ... كان سلكوها ...


المصيبة الكبيرة فين ؟ في أنو الخطاب النهضوي خطاب شعبوي ، يعني بالأساس يمس الشريحة الأكبر من المجتمع ، أقصد الشريحة ذات الثقافة المحدودة ،المنعدمة وللى الثقافة المدرسية التلقينية...
بالفلاقي العباد المتواضعين الكبار شوية في السن والعباد المدمنين على قنوات النيلسات والمتدينيين الجدد ومراهقي الفايسبوك (من جماعة بسيكو آم مثلا ) والفقراء و... و ...والفرائس موجودة تبركالله
النقطة الثانية اللي يكسبها الخطاب هذا (على حساب المنافس والناخب ) مقارنة بخطابات شعبوية أخرى ، هي شرعيتو الدينية ، بمنطق : مالأخر كلامي أنا صدق الله العظيم  "وكان الشعب ما ختارنيش راهوغلط" ، ولازم نرجعوه على السراط المستقيم ...
 كيما جاء على لسان سيدنا الشيخ إجابة على سؤال " ماذا سيكون موقف حزب النهضة كان ربح حزب العمال الشيوعي في الإنتخابات " في حوار في قناة تونسية ...

النقطة الأخرة اللي نتصورها الأهم، هي  الوضعية التاريخية للحزب ، واللي تذكرني لحد بعيد في وضعية يهود إسرائيل...
الشعب المسكين المضطهد اللي تحرق في الهولوكوست ومبعد مشا عمل دويويلة صغيرة عالبحر. و حتى كان فكها وقتل ماليها، نورمال ، ياخي هوما عانو شوية وللى شوية؟... ورد بالك لا تشكك في تاريخهم ولى تحاول تنقد ذلك الشعب المضطهد ، مكانش تولي متهم بمعاداة السامية  ...

الصورة قريبة برشة ، وما عليك كان تبدل الهولوكوست ومعاداة السامية ، بدكتاتورية بن علي والإسلاموفوبيا وللى الأصح النهضاويفوبيا ...

ولك رغم كل هذه "المساعي الحثيثة" (خير مني وزير الخارجية ؟) يبقى حزب النهضة حزب موش معترف بيه ...
ولكن ، هل باش ينجم يأثر في منهج تغير الدستور وقانون الأحزاب ؟
كان لا ، شنوة مدى الخطورة اللي ينجم يخلقها إقصاؤو مالميدان السياسي؟ خاصةً وأن الإعتراف الأخير بأحداث باب سويقة يثير مخاوف أكثر مالاطمئنان خاصةً كي يجي الإعتراف بعد 20 سنة من الإنكار ...