عامــيـــــــــــــــــــــن

عامين تعداو على أول حرف كتبتو،
106 أرتيكل مابين البلوغ هاذا ولاخر ..

 برشة تكتبو في الغش ...
برشة كتيبة عالحيط ...
برشة كلام مالقلب ...
برشة هزان ونفضان ...

ألسنة عام سبيتيال ... عام تصنصرت فيه ، عام بن علي هرب فيه ، عام تعرفت فيه على برشة عباد مالبلوغوسفير ...  تعرفت على تونس الجديدة ...

قبل ما المافيوزو يهرب ، كانت أكثرية التدوينات تحكي على الحجب والحالة السياسية ألفالصو اللي كنا عايشين فيها ... وتوا آش بش نعمل؟ نكمل نكتب؟ مزال عندي ما نقول؟ عندي على شنوة نحكي؟ تي هانا ولينا عايشين في المدينة الفاضلة وجونا ليكس والمشاكل الكل وفات و الشعب بلغ من النضج والوعي و ها كالكلام ... (أمممم)

على كل،

نوعد بلوغي ما نفصعش بيه ونخليه ينعق فيه البوم على خاطرو كان من بين البلايص القلايل اللي نجم نكتب فيهم ونحل فيهم فمي (إفتراضيا) من غير ما نسمع : يزي أسكت ، سيب علينا الحيوط بالوذنين ... على خاطر ما كانتش عندي الشجاعة بش نعيط بأعلى صوتي ونريسكي بش نروح قطايع...

نتمنا لبلوغي جويوآنيفيرسير وسنين دايمة ! :)

Un an déjà !

Voila déjà un an depuis le jour ou j'ai mis le premier mot en ligne ...
355 jours et quelques 48 billets après , je suis fier de mon pays
fier de ne pas être censuré...
fier de ne pas être mis dans une cellule de détention...
fier d'avoir des espaces d'agrégation libres (ici) (ici) (ici) (ici)
fier de ne pas avoir à cacher mon identité . eh oui, schizophrène ou pas "Youssef 3al-7it" est bien mon vrai nom...
et pourtant je m'exprime librement ...



au terme de ce billet coincé entre "blaguer" et "Bloguer" je me souhaite un joyeux anniversaire :) .

...ثنين وسبعين سنة مبعد

ما عيني باش نكتب حتى كلمة ...

9 آفريل 1938 العباد قامو وهاجو عالأحتلال والقمع ... 72 سنة بالضبط مبعد، الشعب ينوح عالكورة ... مسكينة تونس فين هزيناها...

حتى لوقتاش بش نقعدو مطفين الضو ؟

نحب نهنّــي ...

اليوم 20 مارس ، الذكرى ال-54 للإستقلال ، 54 سنة تعدات ملي تونس خذات مصيرها بيديها...

منحبش نحكي ، اش حققنا وأش مازلنا ما حققناش بعد 54 سنة إستقلال ، نحب فقط نهني التوانسة الكل بالعيد الوطني الأهم.

نحب نهني ألي نساو ما زينوش البلاد بالعلمات... وانا قاصد ربي ليوم فالثنية زدت تأكدت من كلام ولــد بيـــــــــــرسا ، لا نجمة ولا هلال ... أما نورمال مادمنا مستقلين ...

نحب نهني الوكالة الوطنية للإنترنات وزايد بش نزيد نحكي ...

نحب نهني للي يصنعو واللي سماو الدخان 20 مارس ... حتى كان منتوجهم يصنع في الضحايا حتى بعد الإستقلال وبإسم مقدس كيما تاريخ الإستقلال ...

نحب نهني التلفزة الوطنية حتى كان مرامجهم الوثائقية المعمولة للإستقلال، تحكي على كل شي ... كان الإستقلال...

نحب نهني ...

نحب نهني ...

نحب نهني...

ونحب نقدم إعتذار للشهداء اللي وهبو دمائهم باش يلونو علم تونس ...

... اليوم الوطني لل

اليوم، 8 من شهر ديسمبر. كيما كل عام من هاكل العام تبدا الحملة الوطنية "لتلقيط" التبرعات، هاكل شوية مليارات ألي باش نعاونو باهم الزواولة ...
شخصياً عندي برشة ملي نحضر هاليوم الخارق للعادة و كل 8 ديسمبر نزيد نتعلم التضامن على قاعدة وتزيد تتأصل فيا روح العطاء ...
كل عام نزيد نفهم المعاني السامية لهالنهار الهايل .
وكل عام تزيد تزيد ثقتي تقوى بجامعي الضرائب... نقصد التبرعات .
نتذكر زادة فالمعهد كنت ديمة وفي ، وديمة ندفع ، والإدارة مش مقصرة في تذكيرنا بأنو التضامن لازم يكون منبثق من اقتناع شخصي ، ومسهلتنا الأمور ، وكل شي واضح زادة.

و أهيا تصويرة لقيتها تغني عن كل تعليق ...

وكل عام وانتوما والزواولة بألف خير .

حرب اللحم

ساعا قبل كل شي عيدكم مبروك الكل ، لل مسلمين ولعشاق المشوي زادة ...
ليوم نهار العيد ، وتوا رهو إل علوش تذبح وتسلخ ودقدق،وعند بعض العائلات راهو وفى ضربة وحدة ، والدنيا ماكلة بعضها براحة تشوشيت الريوس والساقين .
أما باش نوصلو إل هوني لازم قبل نشريو سي العلوش ، أهوكة السنة سومو حنين ، معناها بنسبة لل شهار ، كي يشري علوش معادش ينجم يشري حتى حاجة أخرى معاه ، ترصيلو يفتر به فطور إل صباح ،ويفطر ويتعشى به ، حتى إل خبزة معادش يخلط عليها يولي يعدي بل علوش ...
حتى باش يشري حاجة يلبسها لا ، أهوكة الصوف يهزو لل تارزي يطلعلو منو كسوة كان يحب ،و يخلصوا باللحم بالطبيعة ...
انا مازلت ما فهمتش لهفة التونسي عل علوش ، زعمة هذا إل كلو إمان ؟ ممكن ....
أما الحاجة إلي متأكد منها إنو التونسي ، ياسر مغروم بكرشو ، وبقفتو اش تجيب ، أعطيه ياكل ، ويبدى عندو كبش بل قرون خير مالنعجة متع جارو ...
فالاخر الكلو ماشي .... غادي :)

...وبل شفى ليكم