بخور وسناجق... وكمشة دراوش

كيما تعرفو رمضان قرب، ونفحات الإيمان بدات تهبط على بنادم في العواشر ... ربي يثبتنا ويثبت جميع المومنين .
فما جماعة، يهدينا ويهديهم، لقاوها فرصة باش يعملو إستعراض قوى كل واحد شكارتو اش لمت عام كامل من "الجهاد" الإفتراضي ، والله في خلقه شؤون ... ويبداو يخرجو في الخنار لداعي جمع الحسنات ... في الشبكات الإجتماعية بالطبيعة على خاطر على قارعة الطريق اللعب مسكر عليهم وعلى جميع خلق ربي ... الله لا يدوم حال وبرا ...

من المواضيع المتداولة النقاب ...
توة تسكر الدوسي متع الخمار اللي يغطي الشعر ... ونقص القلق شوية في الإدارات والمعاهد والكليات وولات المرا اللي تشتهي تلبس فولارة , تلبس على روحها , و نورومال , والحمدلله على خاطر مهما يكون رايي وللى رايك في اللبسة هاذي تقعد حرية شخصية , و ما تضرش الحريات الشخصية متع الغير ...
أما حكاية النقاب هاذي بدات تطلع بالشوية بالشوية موضة جديدة و أجواء وهيا نلعب ... وليت ضربة ضربتين تلقى تصويرة وللى فيديو فيها محاسن طرف قماش , اللي عبده والمعبود ربي... و اهات الطرب من كل شيرة .. "ماشالله" ..." تبركالله" ... "ربي يهدينا كيفها" ... و جرب تجرء و قوللهم كلمة عالخيشة اللي عاملين بها القهر... غير تفرج في العرض و مصطلحات تحت الحزام.
سبحانو ربي ...


توا بعد المناضلين للمرا الكل إبداهم بالطاهر الحداد وتعدى بالحبيب بورقيبة ...
بعد هذا الكل تجيك طفلة تقلك , "وجهي ربي خلقو باش نغطيه و ما نوريه كان للراجلي باش يستمتع بيه" ... شوف الضرب الصحيح يا زمان وصلنا لقمة الخضوع والتخلف ...
و تلقى رجال والرجال قلة كيما قالو عليه , يقولك "إي شبيه نحبها قطوس في شكارة" ...
و لخرة تقلك "فما حاجة اسمها رؤية شرعية يشوف فيها الخطيب خطيبتو"... باش ما يتغشش فيها , تطلعلو مدموغة وللى عين تصب في عين لا قدر الله... وللى تطلعشي فريجيدار قديمة وللى محبس حطوه في كالشكارة....


قالك وجه المرى يجيب الشهوة الجنسية ... الحقيقة ما صارتلي حتى مرة العفصة هاذي , متأكد اللي الحكاية ماهيش خلل فيا هههه, أما نعرف اللي هذا اللي يصير كي يبدا الكبت الجنسي عاطي ب أطنابو والمكبوت يشوف مرا تقول شاف علوش حليب باش يتعشى بيه ...
توا تجيني مرا لابسة نقاب, باش تكلمني , باش بش نفهم وجهك انا ؟ باش بش نفهم الأحاسيس إللي تحب تبلغهم؟ عاد أقعد فالدار و كلمني بالتليفون و تهد ...
زيد وجودك فالشارع خطر عليا و عالمواطنين الكل ... شكون اللي ينجم يقلي شكون متخبي تحت النقاب ؟ راجل؟ مرا ؟ مجرم؟ قواد ؟ مريض مرض ميكروبي معدي؟ والقايمة طويلة ...
و زيد شوية يكملو يرفضو باش يتصورو في بطاقة التعريف ٬ و يكشفو وجوهم فالمطار و عند الطبيب وفي المركز إلخ إلخ...

شد داركم حط النيلسات تفرج في الشعوذة و كعيباة تمر و ريض شوية أختاه ٬ راهو مخك فارغ كيف الشكارة اللي لابستها
و على ذكر النيلسات... إياك ثم إياك تجبد المشيخة بكلمة ... آه شبيك فريد؟ وين ماشي؟ هذاكا , المعصوم من الخطأ، الطاهر، النقي، التقي، الزكي، الذكي ... خير مني و منك , مختار من عند الله ...
تي برى بوسلو صبع ساقو و سيب صالح هانا رجعنا للوثنية كملو إعبدوه ونفسونا... شكون إللي عطاه ها الصلوحيات هذي كان موش الجهل المزمن ...
شلكتو الدين ضحكتو علينا الدنيا ... كيفاش تحبني نحترمك و نحترم اللي يدعيو بإرضاع الكبير و رجم القرودة و تحريم الجلوس عل كراسي و البص عاليمين ...

نصيحة لله سيبو التلكوموند والفايسبوك وبراو أعملو حاجة تنفعو بيها بلادكم و غيركم ونفسكم ، كونو جمعياة لإعانة البطالة اهيكة الدولة مش مقصرة كل عام تخرج الألاف ... لكفل اليتامى ، لرعاية المعوقين، وللى حتى للرفق بالحيوان ... وتو تشوفو الحسنات كيف تهبط كالشتاء ... هذا هو صلب دين الإسلام موش الخضوع والأنهزامية والنمطية ، ونشر الفكر متع الدغف ... ماناش ناقصين علل عالمجتمع...

و باش ما نقولش كلام آخر موش في بلاصتو نختم... برى عاد توا، أحلو دمه هههه.

يرحم والديك حنبعل

ساعة قبل كل شي لازم تعرفوا معزتي لحنبعل ...

وهاذاك علاش قعدت متردد بش نكتب عليه حويجة وبش نرمي عليه الورود و هو في غنن عنها...

موش نحكي على حنبعل ألي خربقها في روما وعمللنا برشة مشاكل وزيد يعبد في "بعل حمون" ولا شنوة ...

لا هذا ألي نحكي عليه مسلم ومسالم وزيد ساهم بقسط كبير بش ينمي زادي المعرفي ويحلي عينايا على برشة حاجات محيرني ومطيرنلي النوم من عيني ...

باش مانقعدش نتكلم فالمطلق ونهز فالقفة على جنب هاو بش نحكيلكم حكاية .

نهارتها كيما العادة روحت نجري للدار بش نخلط على هكالبرنامج أللي يحكي على الناس الأخرى ، بش يوعيو الشعب إنو الجنون مواطنين كيفنا كيفهم أما جوهم موش باهي برشة.

ما تتصوروش فرحتي بهالبرنمج على خاطرني كنت مقتنع وحتى حد ما حب يفهمني ...

كيفاش تراه ؟

ياخي ما تراوش ؟

زعمة علاش الكياسات مكسرة والبلديات جهدها طاح فالتصليح

"اكيد راهم جماعة مالجنون جاو حفرو الكياس باش يعملوا ربط مع "السوناد

متع الجنون) وخلاوه فرطو خارج هكاكة) ...

وعلاش فما برشة بطالة مع توفر مناطق الشغل بالبالة ؟

تي مو الجنون شدولنا بلايصنا نحن الإنس، وزيد قاعدين يكركرو فالخدمة وماهمش يخلصو فالتقاعد ...

باهي، مالة علاش هاكالعام ٩٩٪ في الإنتخابات ؟

علاش موش ١٠٠٪

قتلكشي فما جنون ، جاو فسدوها ومخلاوناش نفرحو على قاعدة ...

وقصان الضو ؟ وماء السبالة ألي كسر القاعدة متع الايقاظ العلمي (لا لون ، لا رائحة ولا طعم له )؟ وحركة المرور الداخلة بعضها ؟ والمترو ألي اجي كل سنة كبيسة ؟ وهلمجر ... باش نفسروهم ؟

يرحم بوك أحنبعل ، توا كل شي ولى واضح !!

ملاحظة : وأنا نكتب فالتدوينة قصة عليا الأنترنيت ثلاثة مرات ، أكيد راهو ولاد بسمالله فطنو بيا نفضح فاهم... هههه

الشيكلي

كيفما كل ثاني وإلى ثالث عيد يكون ألإتجاه دار الحاجة ، وين تتلم العايلة والأهم وين يطيب الكسكسي بالعصبان هههه.
عادا كيف وصلت دخلت بحذا الجماعة ، نلقاهم حاطين "روتانا" ويتفرجولي على صانعة تشطح بمحبس فوق راسها ... أية بدل علينا هل فصالة ،
تونس 7 عاملة برنامج هايل ثلاثة فنانين ممتازين يغنيو فالملوف... ، هو نهار أحد وهوما يزيدو عليه ... بدل !
وقعدت نبدل نبدل ونبدل حتى طحت بحنبعل حاطة "ألإتجاه المشاكس". برا قلت خلي نسمع شوية ضمار ماصت ، عل أقل خير مالملوف ...
وأنتم حرقتم العلم المصري وهم حرقو العلم الجزائري ... ومصر والجزائر وبرشة كلام من هذا القبيل
تي مازالو غادي هذوما ؟ تي ماهو الطرح تلعب ووفى ، واللي ربح، ربح. واللي خسر، خسر ، واللي مات الله يرحمو . واللي تعاركوا أمورهم بين بعضهم
وهل حكايات متع الهمجية ، ماهيش حاجة جديدة علينا نحن العرب، والشمس ما تتغطاش بالغربال ... وليت وين نمشي نسمع بها هل حكاية ، وين نحل نتفرج نلقى كمشة مثقفين حطين كراسي وطاولة ويقطعو ويريشو كيف لعزايز ... ، فالفايسبوك "ملتقى شباب وشياب تونس" خمسة ألاف جروب على هل موضوع ال-"حساس" ،حتى فالجامعة قالولنا باش يدخلو مادة جديدة اسمها " بونيا مصر ودزاير"...
وأنا زادة هاني دخلت فالعجة وكتبت تدوينة على هل حكاية .
توا سيبونا عاد ، راهي لحكاية ولات شيكليييي بل ياء مش بل ألف .
يا فلان, رجع أكل رقاصة بالمحبس هههه.

l'info

je voudrais vous faire part de mon avis sur une chaîne télévisée, grande de son âge mais "jeune" de son esprit .
il faut savoir que ses principaux centres d'intérêt sont le sport , les clips et l'Info.
comptez une page d'info toutes les heures avec pour complément la fameuse barre bordeaux qui nous accompagne dans toutes les émissions et qui ne nous fait pas du tout chier .
pour ce qui est du contenue je trouve fort intéressant ce que cette chaîne diffuse ; des nouvelles de tout le Globe qu'on ne trouve nul part ailleurs
Disons Merci alors a cette télévision qui nous soulage tout en nous tenant informés et conscients

et portons un toast a l'honneur de sa devise " ça ce passe mal ailleurs , vous étes au paradis ici , citoyen il faut faire Dodo !"