نظراً للنشاط والحيوانية متع الأخ الكريم عمار ، والنسبة متع التدوينات المكتوبة خصيصاً ليه ، قررت باش نبدل أسم المدونة إلى " يوميات عمار " ، هكاكة نكون متهني أني كل يوم باش نكتب على الأقل تدوينة تخص تحركاتو
منجمش نشد روحي الله غالب
يا عمار يا بهيم
نشالله قبل كلشيء تسامحوني على العنوان العنيف شوية ... حاولت بش نلطف فيه قدر الإمكان، وبش يكون زادة كمباتيبل مع الحالة اللي تنطق مل أجناب ومالفوق وماللوطا ومالبلايص الكل ...
مو كيما تعرفوا التعليم في بلاد الطالب المعد للتصدير يتقسم إلى ثلاثة منظوماة ،الأولى منظومة التربية والتعليم .
في المرحلة هاذي، تتعلم العلم على قاعدة، وساعات كي تبدا عندك الفرتونا، تاخذ العلم من روس الفكارن ، آه مالا كيفاش كنت تنجم تعيش من غير ما تبدا قاري "خط مغلق وخط مفتوح" ؟ ، أهوكا زادت إللي عندو شوية بوادر نبوغ ياكلها في جنابو وينصهر ، كيفاش مالة باش نطبقو سياسة تكافء الفرص ؟
من غير ما ننساو زادة الجانب التربوي الإنساني ، وقتلي تشوف المعلمة تخبط في تلميذها بكل أمومة ، وتحس في ها كالعصا نفحات متع حب عنيف مع كل ضربة ، وللى اش ملزها هيا تربي فيه كان ما جاتش تحب تهيئوا لقسوة الحياة، مالا كيفاش باش يولي راجل ولا تولي مرا نهار آخر ؟ مو لازمو شوية حنان، بش المرة الجاية كي تقولو غلاف الكراسة لازمو أصفر بالكاروات ، يجيبوا أصفر وبالكاروات مش اوني، ويعطل سير الدرس ويمهمش صحابو باللون الأصفر الأوني
فما حاجة أخرى يعلموها للصغيرات أما نسيت اسمها ، أهوكة حتى الكبار يمارسو فيها بإتقان. هوما زادت عندهم صبورة يقيدو فيها أسامي المشوشين حاشا ها الحيط ...
المرحلة الثانية اسمها التعليم العالي ، وأخيراً وفقني ربي باش نفهم اش معناها عالي ، على خاطر جيت نشوف في الكليات ما نلقى فيها عالي كان البلايص ، معناها جايين في صعدة في إغلبيتهم...
في المرحلة هاذي تبدا تتحسر على ايامات التربية والتعليم وقتلي كنت تقرا فالحومة والمعهد في راس النهج ، وبرشة عباد يتحسرو على العز متع الدار والفرش للي خلا بلاصتو .
في المرحلة هاذي تفهم قيمة النوار للي كانوا يجيبوه للمعلمة متع الحساب ، وتفهم المعاني السامية متع " أمي تسلم عليك ، وقاتلك تعادالي للبوتيك " اللي ديمة يصبحو بها عالمديرة .
إما الحاجة اللي تحسب للمرحلة هاذي، أنها عندها إرتباط وثيق بللي قبلها ، معناها كي تبدا متعدي بالدزان ، ومكش فاهم مليح التربية والتعليم ، ما تنجحش
مثلاً كي تبدا ماكش فاهم مفهوم التشويش ، ويبدى المعلم الله يهديه ما خممش في مستقبلك وما ذوقكش حلاوة الصطاكة ، كيف تولي طالب تطلع مشوش، وتقلق أصحابك، أي نعم .
الحمدلله ،فما المنظومة الثالثة، اللي دخلت حيز التنفيذ، باش تصلح الخلل الصغير هذا ، وهي منظومة التربية البحتة ، غادي عادا ما تخرج كان فاهم ، سينون عندك الحق في إجبارية الإسعاف
فاليحيا التعليم في تونس تحت شعار "ترص أقرى وسكر جلغتك "
أيا توا نخليكم، خلي نمشي نعمل ضرباة مراجعة، فماش ما يراني المولى وندبر خرجة...، موش على حاجة أما بش ننشر الفكر التنويري هذا في إرجاء المعمورة ...
(يمكن تتسائلو شنية العلاقة بين التدوينة هاذي واللي قبلها ... حتى أن ما نعرفش... ) يا سي عمار طبالة تي سيب علينا مالمقص وأنتي شادو كالعلقة ... سيب ارابيكا راك لصقت فيها كالبقة ، سيب جماعة البلغو الكل ، ياخي وقتاش باش تفهم اللي راهو ما تنجمش تشد الحريات ما تنجمش تقص جوانح لحروف ، ما تنجمش تمنع صوت الحقيقة عن الصراخ.
تي بالعربي فما بروكسي يا حاج ، علاش التعب فالفارغ وتشويه سمعة البلاد اللي يحلو فيها العيش وللى شنوة ... ااااه....
تطلعشي تخمم بالعكس ونحن ضالمينك على خاطر يا عمار وخي شجعتني باش نشوف شنوة سبب التصنسيرة وهاني حليت البروكسي وماشي نعمل طلة ، زايد معاك كي تخمم فينا
العصب خلاني نكتب... ساعاة تكتب كلمة خير ملي تكسر اللي تلقاه قدامك من الغالي والنفيس من مقتنيات بو منديل...توا واحد يجيك نهار كامل يعبدلك وجهك بسؤلات، تقعد باهت فالرقعة وللى البهامة متاعو وتخليك تشك في صحة النظرية الدروينية... يطلعشي هابط من بهيم حاشاكم وللى صندال...لا وتقول توا يحشم وللى يتنبز ، وتزيد تقويلو فالدوزة متع السطاكة ... وشي، النافع الله...توا شيهمك في جد بابا قداش نلبس في صبع ساقي...لازم تعرف لون مريول الخلعة ؟... باش ما نجبدش حوايج داخلية أخرىبرى عيش خويا لوج حاجة العب بيها... شوف حكاية تنفعك... برى اخدم قواد مثلاً واعمل كاريار ... أما براس لحنينة سيب صالح...برى خويا أرتع فالبراري... تذكر طبيعتك البهائمية وشيخ روحك بالحشيش البيو... ينفعك خير مالكلام تحت الحيوط... وتعيش عالأقل بهيم بكرامة خيرلك من شكاير البخس...وحتى كان ستانست، توا نجيك من حين لآخر نسطكلك هكاكة مجاني، ميسالش الرخيص وطلب عالغالي...ما تخافش أتوا تلقى برشة جماعة كيفك ، وتلقاو فاش تتلهاو...نعرف اللي الطلبات متاعي ما توافقش مع طبيعتك كتونسي مثالي، أما براس الحاج والحاجة وجد بو مشتقاتهما، أسرح ح ح ح... ونورمال توا نقولك على نومرو سباطي .وحتى كان ها التدوينة معندهاش بلاصة فالمدونة... أموريعلى خير
إضافة : بلغنا خبر عاجل أن الموقع التنصيري (المسيح في تونس ) قد أغمي عليه ... عيشو عميراتو هههه
ممكن هل مدة في المحيط الإفتراضي ، فطنتو بنقاشات حادة وطواول مستديرة منصوبة على حكاية الإمازيغية وخرمة التنصير فالبلاد...
الحقيقة، المرة هاذي مانيش بش ندخل في صلب الموضوع ومانيش بش نعطي رايي . أما فقط حبيت هكا نسأل سؤال بريء خلاني متحير ...
فينكم يا وطنيون ؟ فينك يا عمار ؟
كان تطلعوا بطلتو الخدمة ، هذا خبر هايل وما خسرتش كي كتبت هل تدوينة . أهوكة مالة نشكركم على المتابعة والإهتمام وما قصرتوش ...
أما كان تطلعوا مازلتو تحت ذمة الكونتراتو، وقتها برشة تساؤلات موش بريئة تطرح نفسها ...
في إنتظار الرد ، دمتم على وطنية وتحت رعاية مقص عمار .
وللي يستنى خير مللي يتمنى
مو كيما تعرفو العام هذا سماوه ، سنة دولية للشباب ، الحقيقة مانحبش برشة التسميات هذوما على خاطر ببساطة ماعندهم حتى معنى ... وأهوكا الشباب نعطيوهم عويم يتفرهدو فيه باش يفكو علينا مالتخرنين ... شي !!!كان جلسات التبندير ، وأمسيات تحرير برقيات الشكر والثناء ،ودورات تكوينية في تطوير أساليب التصفيق ... ما فماش شباب فالاحزاب ؟ ما فماش شباب فالجمعيات الغير المتلونة ؟ قررو باش يبداو، وبداو ... ووقتلي الشارع يسأل على الثلاثة مليارات ألي هداوهم للجمعيات الرياضة ، لشكون باش تمشي ، هوما يدورو في الشارع يشريو في الهدايا للأطفال المرضى بشوية عشرلافات لموهم من مصروفهم على حساب حاجات أخرى .
.على سلامتكم
توا اش معناها تقولي سنة للشباب ؟ معناها الأعوام الأخرى ، إلي تعداو واللي جايين، للشياب ؟
ماعيلناش ...
بما أني نصنف روحي مالشباب ، برى قلت خلي نعمل طلة فماش ما نلقى حدث باهي في "الحومة" هكا ولى هكا ينجم يهمني كشاب ...
حتى ألي يغزر مالبرا والي ما ينتميش بصفة مباشرة للفئة الشابة ، يقولك ملا جيل طالع ، شي يبكي الحجر ، (هذا كان خلاوه يبكي)
وهذاك هوا إلي صاير لل أسف ، واللي تسألو يقولك يا حسرة على صغار بكري ... والشاب ليوم ١٠٠% مايع
لا !!! ..
نقولها ونزيد نقولها الشباب ماهمش هكا !! والصورة متع القفة والميوعة واللاوعي ما تعكسش حقيقتنا .
الشباب واعي وحتى كان نسبياً ، والوعي متاعو مش ماركة لا "تفتح باب الرتل قبل الوقوف" ولى "أرمي الأوساخ في الحاويات المخصصة"
شبينا ديما نصورو الشاب لابس مريول الجمعية، هازز شمروخ بيدو ، وكاس موش لازم نقول اش فيه بيدو لخرى ؟
شبي كل ما نجبدو نحكو عالشباب نجبدو عالحرقة والكورة والتدخين والحكايات الفارغة أكهو ؟
علاش ما نحكيوش عالحقيقة كاملة ؟
مثلاً على ذكر الجمعيات نعرف ثلة من الأصدقاء الشباب ، الكلهم من الجنس اللطيف ، قالو علاش ما نعملوش جمعية خيرية موش لازم نذكر اسمها ؟
قالو
علاش ما نصرفوش حتى شوية عالعباد إلي دايرة بيهم الدنية ...
اش خير من إنو نصورو ضحكة على وجه صغير مريض ...
ها البنات معندهمش ميزانية ضخمة بما أنهم الكل يقراو ، أما قررو باش يبداو ، بالإمكانيات إلي عندهم ...
قررو باش يعاونو ولاد بلادهم، إلي في حاجة لعباد هكة... في حاجة لينا ، و إلي في أغلبية الحالات، نساتهم خزائن الدولة، باش ما نقولوش حاجة أخرى
هذا نموذج وإلى مثال للشباب ليوم ، ما نكذبش ونقول الكلهم كيما هكا . وحتى كان يمثلوا أقلية لازم نحكي عليهم... لازمني ومن واجبي كشاب باش نحكي على شبان يعطيو درس في الوطنية ، في عصر ولات فيه تتباع وتتساوم ...
ها الشابات هاذم، كيفهم كيف برشة شباب اخرين ما إستسلموش للتهميش ... وبداو مسيرتهم على طريقتهم ، وساهموا وباش يزيدوا يساهموا في تلميع صورة الشاب كما يقولوها ، أما موش في المحافل الرياضية ولا قعدات المبايعة ...
كشاب نفرح نفتخر كي نسمع حاجة هكة ...
خاصةً كي تبدا في السنة الطبالة متاع الشباب ، باش تبدا أسورتيى هههه
 |
© Blogger template 'Portrait' by Ourblogtemplates.com 2008
Back to TOP
