أيا السلام ...
قعدت متردد برشة بش نكتب ها التدوينة ... نحب ديما نبعد على المناسبتية ... أما زايد باش نهرب، مدام كل يوم ولى مناسبة ...
ها النص هذا حبيت نكتب واحد كيفو نهار 17 ماي ، نهار النكسة ولى النكبة العربية بالنسبة اللي ما يعرفهاش ، مبعد لأسباب بطلت وقلت نرتح "القلم" خير ، قلت فما برشة عباد باش يكتبو وزايد باش نكمل أسطرة عالليستة الطويلة العريضة الكلاسيكية اللي تتنصب كل عام في كل بلاصة ، في المجال التدويني... في الجرايد... وعلى كل لسان... زايد باش نكمل نسب العدو (موش "الكوماستيبل" هه) الصهيوني اللدود .
أيا أمشي يا زمان ايجى يا زمان... (موش برشة ) جات حكاية الإعتداء على القافلة للمساعدات الأنسانية المتوجهة لغزة ،وللي نستغل هالمناسبة باش نعبر على اعتزازي بعباد كيما هكا ، من كل الجنسيات مشاو للخطر ، وما ستناوش أمر من حد من أجل الأنسانية ... والله يرحم الشهداء ألي توفاو ...
جات حكايت القافلة وشديت روحي عالكتيبة ، وتفاعلو العباد على طريقتهم ... أهوكا كل واحد يسب الأسرئليين على حسب "ستيلو" وفما شكون زادا يكمل يسب اليهود الكل ... وكان لزم ينزل عالإمريكان والأروبيين ...
باهي شتم إسرائيل وفهمناه، و نرجعلو مبعد ...
أما آش مدخل اليهود ؟ ممكن هذا جهل ، ولى تأثير الفضائية النايلساتية إلي عندها الحق بما يفرضه حق التعبير باش تبث افكارها، والمتلقي دليلو ملك... ولى تأثير حتى الأيمة في الجوامع إلي كانو حتى لوقت قريب ما يترددوش باش يدعيو باليهود ... ولى تأثير موروث شعبي تقليدي ... كيما عبد يقول "هذاكا يهودي ما حبش يسلفني دينار" مثلاً ولى "عيش ولدي ، أقسم معا خوك الشكوتوم ، ما تكونش يهودي"
كلام تربينا وكبرنا بيه وقعد راسخ في أمخاخنا حتى كان ما عندوش علاقة كبيرة بالواقع...
باهي... وعلاش هالتحامل على السياسة الأمريكية الأوبامية في القضية هاذي ؟
عملنا كيف اكا الجمعية ألي ما لقاتش خير في المدربين في بلادها ، مشاة عيطت لمدرب أجنبي وعملت معاه كونتراتو قمقوم باش يمنعها من السقوط ...
أما وجه الإختلاف معانا ألي ما عندنا مع سي اوباما حتى كونتراتو... السيد ملي حطوه لقانا نصفقولو ، وهو لا عملت لا يدو لا ساقو ...
مو كيما يقولو كل شي يجي بالسيف كان الحب بالكيف . وكانك على نوبل للسلام ههه تو نمشي نعمل جريمة ولى ثنين يعطيوهالي ، ولى ناكل طراحة ونقسمها بالتساوي معا اللي خبطني، هكا خير ...
نحنا قاعدين نرتكبو في أخطاء فادحة ونطلبو من إسرائيل ولى غيرها باش تكون عندها روح رياضية وتخرج الكورة للتوش وقتلي لاعب يتضرب... وساعات نحبوها تسيبلنا الطرح جملة على خاطر ما فماش لاعبين والأجانب رافضين التجنيس ...
كي يجي نهار وننجم نحل فمي ونتكلم وما نبداش خايف عليه لا يطيح
كي يجي نهار ، وقتلي نرى ضلم ولى سرقة ، نقوم نصيح ونعيط
كي يجي نهار ، ونبدا فخور بحاجة قدمتها للبلاد إلي عايش فيها
كي يجي نهار ونبطل باش نكون" كالبهيم" أي نعم، مع كل اعتذاراتي للبهايم على التشبيه هذا...
وقتها نقول إسرائيل عدو ... توة ، مبعدني عليها ...
