Pages

dimanche 8 août 2010

شكون قال فلا مجال في عصرنا لرئاسة مدى الحياة ولا لخلافة آلية لا دخل فيها للشعب .؟



"فلا مجال في عصرنا لرئاسة مدى الحياة ولا لخلافة آلية لا دخل فيها للشعب


فشعبنا جدير بحياة سياسية متطورة ومنظمة تعتمد بحق تعددية الأحزاب السياسية والتنظيمات الشعبية"

بيان 7 نوفمبر 87



ايييه محلاهم هالكليمات، كل ما نقراهم نحس بالفرحة والحبور وساعات تهبطلي دمعة من عيني وتتسرسب على خديا ...
نقول شو كيفاه العبد يبجل مصلحة بلادو قبل مصلحتو الشخصية ... رغم اللي عندو الإمكانيات بش يكون عكس هذا ...

أما الله غالب فما عباد تصطاد في الماء العكر وتتجرء باش تتعالى على هالأرادة السياسية الحكيمة ...

أي نعم هالنوع من الأشخاص الله يهديهم موجودين ... ضايعين فيها واللى يحبو ياقفو ضد الشلال الديمقراطي اللي ماشين فيه توة سنين...(ممممممم)

هالإشخاص يناشدو رئيس الجمهورية الحالي بالترشح لمدة إنتخابية أخرى ...
(شوف الضرب يا بو قلب )

توة رئيس جمهوريتنا ربي يطول في أنفاسو، قاعد يمارس في آخر مدة إنتخابية ليه وهذا بإرادتو وبإرادة كل الشعب ... وقتلي تفاهمو على ألفصل 40 من الدستور عن طريق الإستفتاء ...

بعد هالمدة ربي يوجهو خير

يقول ألفصل :


الترشح لمنصب رئيس الجمهورية حق لكل تونسي غير حامل لجنسية أخرى ، مسلم مولود لأب ولأم وجد لأب ولأم تونسيين وكلهم تونسيون بدون انقطاع.

كما يجب أن يكون المترشح يوم تقديم ترشحه بالغا من العمر أربعين سنة على الأقل
وخمس وسبعين سنة على الأكثر ومتمتعا بجميع حقوقه المدنية والسياسية .


ورئيسنا من حقو ومن واجبو بش ينعم بالتقاعد والراحة كيف الشعب الكريم الكل، بعد عشرات السنين من
العمل الدؤوب وموش من حق أي شخص بش يحرمو من حقو و من إداء واجبو.
موش كيما عملو مجموعة من الأشخاص، اللي لا تحسب على الشعب التونسي الرصين اللي بالنسبة ليه الدستور هو أهم نص يلتزم بيه أمام بلادو ...

لا والغريب في هذا الكل أنو هالعمل الغير مسؤول باركت له صحيفة من المفروض أنها
وطنية ونشرتو...

اللهم تطلع الجريدة تخدم في مصالح ضيقة أخرى من شأنها الإسائة بالبلاد ورئيسها الحالي ...


وهنا إطالب بفتح تحقيق وعدم التسامح مع هذه الفئة اللي ما تحترمش الدستور والإرادة السياسية
الحكيمة ..


وكان غالط ... صلحوني

2 commentaires:

extrablog a dit…

اكسترا بلوغ يدعو إلى إستفتاء على تنقيح بيان 7 نوفمبر والدستور (شيلا بيلا) لتجاوز مثل هذه الأزمات مستقبلاً ؛-)

Youssef a dit…

علاه التنقيح وخساير الوقت ... عندي الثقة في الدولة والناس بوجهها واللي يعملوه مبروك ههعع