العوج كمسؤولية وطنية ، بين الواقع والافاق

كوني مواطن مثالي ومواكب التكنولوجيا ومنصهر فل عولمة ، عملت الترسيم متاعي فالجامعة إلي بش نقرا فيها ، بالانترنيت عالي التدفق ، ولي ما قصلي حتى نهار من النهار إلي عملتو ، يعني من النهار إلي عملت فيه المطلب

.و على ذكر المطلب

توا يا عباد ربي ، انا نعمل المطلب ، ونحب نستنى شوية إيجيو يجاوبوني بالموافقة بالوقت ؟ ، علاش مزروبين ؟ نحب نستنى جميعتين عل أقل . يا رسول الله توا مينجموش يقولولي إرجع غدوة؟ ، وإلا يقولو ناقصتني بطاقة عضويتي في جمعية أحباء النخيل ؟ . خالي الواحد يروح و يرجعلهم من غدوة . نحنا ما طلبناش باش يرجعونا 10 مرات ، أما مرتين وإلا 3 يكفيو . وعاد شبيه كان نحلمو ب10 ؟ المستحيل ليس تونسي ...

. نرجع نكمل كلامي بعد ما كملت الترسيم ، جيت نعمل في طلة على موقع الجامعة ، قلت جامعة عريقة اكيد باش يكون الموقع هايل . أما مع الاسف ماكانوش عند حسن الضن ! توا تجي تحتلي تاريخ التسجيل في بلاصا واضحة وتلقاها من غير تعب ؟ علاش ؟ خلي نحرق مخي شوية ! وإلا متحتهوليش جملة ، خليني نطلعو وحدي باش نحس روحي فالبلدان المتقدمة ! .عاد حكاية هل موقع وهل جامعة طلعتهالي ، قلت نمشي نتفرج علا مسرحية متع مدح ونبدل الجو

مشيت باش نفلت إل ترينو لول وثاني وناخو إلي بعدهم ، جا لول محبتش ناخذو ، ياخي اكل شوفور قعد يستنى فيا ، تي تصور ! ما سكر البيبان كان مل تران بدا يمشي و العباد إلي تحب تطلع الكل طلع !23:45 : غزرت لل وقت اللي يخدم فالمحطة

عجب توا ، فالصيف الصايف ، والعباد فالمهرجانات والترنوات ماشين جايين ؟ علاش مش يخليو اخر ترينو العشرة واللا لحداش ، أهوكة الواحد يمشي بالترين ويروح في تكسي واللا علا ساقيه ، واللا حتى علا يديه ، المهم باهي التنويع

ملاخر من كثرة النظام ، بطلت منها المشية للمسرح ، وبطلت منو التسجيل فالجامعة إلى متى بش نقعدو هكا منظمين ؟ اليوم الواقع يقول اللي لعوج عندنا يكاد يكون منعدم، إلا عند ثلة من الإطارات اللي مازالو ييتحلاو بالضمير المهني وشنوا الحل ؟ الحل يا اخي إنو الواحد لازم يتذكر روحو إنو تولد منظم ، واللي من خلال طموحو ينجم يتعلم العوج

واساليبه وتقنياته . ويربي الجيل الجاي بش يكون معوج ولازم ما ننساوش إلي تكريس أسس العوج مسؤلية وطنية

ومايدوم شي كان وجه ربي، والعوج