Pages

mardi 12 juillet 2011

ثورة وذني وحرية وذني !


البوست هاذا فيه برشة كلام ماسط ولذا كان ما تحملش واللا حسيت روحك تمسيت في مقدساتك ، موش لازم تغشش روحك وإشرب كاس ماء مسكج وأخرج شم الهواء.


عندي مدة وآنا دمي يغلي ، ونقول، لا ميسالش ... ماهي إلا هوجة وتتعدى ... تي ريق مفرخ وبرة ... تي شوية إسهال متع بهامة وسوء هضم للثورة ويتعدى .. لاباس!

آش من لاباس يا عم صالح !!! ثورة ثورة ثورة !...
 ثورة وذني !
يا بالحرام بديت نندم عالياللي اللي عديتهم نكتب عالحجب ونظام بن خرا عقاب الليل ،ومبعد نمشي نمرقد في الدرس !! ، وعالنهار اللي خرجت فيه نتظاهر! والسوايع اللي ما دخلتش فيهم نقرا باش نمشي لإعتصام وذني ونطالب "بحقي" وحق غيري  باش يحل فمو ويعيش كإنسان !

بلكشي كسرت راسي وسهرت وتضربت وبكيت وبت خايف لا يجيو يكرفتو *** على خاطر كتبت في عقاب صفحة واللا بلوغ بش مبعد نرجعو أخيب مللي كنا !! 
باش مبعد يجي حزب وواللا واحد مكمل، عندو سنين ما تجرئش باش يحط ساقو في تونس،  ويحل  في دين أم فمو ويقول ساهمت في الثورة





 واللا لاخر يقلك ضربوني وظلموني و****ني... وثورة الشباب... ونترحم على الشهداء ...ونحب حقي، آش من ثورة وآش من شباب متع وذني ؟؟
واللا لاخر عمرو آش وثمانين ويطل مرة في الفال ويبدا يفصص و-"بحيث" و-"جيبولي القناصة" و-"كعو بن بعو"

آش ها السرك اللي حليتوه في جد أم البلاد !!!
 وحدة متروشة عملت فيلم تزمر وحدها ، جاو كمشة خلايق بهايم وعملين فيها صيودة بو قلادة وجموع شادين الميضة توا 50 سنة ولا واحد فيهم حل فمو وتوا ولالي مدافع عالهوية وعلى دين امو وأمي ! وولاتلي قضية الشرق الأوسط ! خمجتوها بالتفاهة!!



وجموع تكفّر من غادي وتسب في عباد أشرف من مناظرهم الحرف بألفين مرة !
من غير ما نحكي عاد على أصوات الحمقى اللي طلعت كي الفقاع ضربة وحدة !


بلكشي ثورة "بلع فمك آنا بش نشد الكرسي" هاذي ؟ وللى ثورة "هيا نبدلو لون الدكتاترية"؟ قالوا تطبيع وأسلامية وشريعة وهوية عربية ومقدسات وبورنو وهيبة الدولة ومحكمة عسكرية ! تي تررت روح !! ما إتفهمكم والله لا تحشمو !

راهي حرية !

liberté !
freedom!
Libertààà!

واللا تسخايلو بلحق وليتو في حرية جاء وقت بش تحشو منها شوية ؟؟ تي الحرية اللي حاسبينها عندكم هشة كي الورقة،
 عايشين في وهم تسبو في بن علي وليلى وفي جثة التجمع والأحزاب ألي ما عندها حتى سلطة !
نهار ألي تخلط على الفرياني تو تفهم !
هاذي غلطة العباد اللي بلحق ساهمو في ها التحرك من غير ما يغزرو للقدام وما خممو كان في عملية الهدم !


هاذي غلطة العباد اللي بلحق عطاو الغالي والنفيس للحرية ... نقولها ونعاودها ، للحرية ! موش لخدمة أديولوجية واللا عقيدة واللا توجه ! ومبعد ما طلبوش الكلمة والمناصب على خاطرهم أرفع من هكا !


لحاجة اللي تخوف وتنرفز اللي نسبة موش قليلة من ها الشعب "جوسكوبوتيست" للسماء ! وكيما تشوفو اليوم عامل القهر بالثورجية والدفاع على الأشباح متاعو ، نهار آخر تلقاه خانس كي الحجلة أكثر مللي كان!



يا بالحرام كان ما تصيرش معجزة ها الثورة لا تسواها مليم وما سلكوها كان شهداء الوطن  !

4 commentaires:

Oussama Haoues a dit…

الجرذان! يعملو ثورة ولاّ يعملو سخطة يقعدو ديما أوفياء لعقلية جربوعستان! صحة عليهم أهل الكهف، رقدو و قامو يلقاوْ الفترة الإنتقالية وفات! وسع بالك يا عالحيط و ماتنساش تاخذ جرعة يومية من جلال بريك

Fontomas a dit…

Le comble c'est que personne absolument personne n'a parlé du droit du citoyen, des droits plutôt!!! Une société de citoyens peut résister à n'importe lequel des dictateurs!! Aujourd'hui tout n'est querelles de cour d'école primaire (mté3i 5ir min mté3ik LoL xD )!!!
Vraiment c'est pathétique!!
Il nous faudra une génération ou deux pour atténuer et non éradiquer cette violence qui nous anime!!!
Moi je propose une sorte de "Hyde park" avec un "Speakers' Corner" dans toutes les circonscriptions pour que les gens se défoulent sur le gouvernement et les politiques tunisiens sans que personne ne leur disent quoi que ce soit!!! ça peut paraître ridicule mais pensez un instant que "il KABT" de ces gens là est évacuer peu à peu à travers ces parcs!!!!
Faites une recherche sur "Speakers' Corner" et vous verrez son histoire en Grande Bretagne!!

Youssef a dit…

y'a plein de "speakers corner" ici à Tunis :)
mais je pense que le problème n'est pas dans les espace d'expression mais dans les mentalités des simples citoyens et de "l’élite" politique.

Oussama a dit…

ya bel7ram lé taswéwha mellim!! :-D
Sinon, haw bech na3mlou fasse5 w 3aoued vendredi nchalla :)