برا قيد واللا برا عدي

تي شنوا تاوا آش مزال فيها ؟
مزلت متردد ؟ ... لا انتي بيك حاجة وربي يسترك ...
قلبك ما يحسش ؟
ما عندكش شعور ؟
كون مام ، حتى كان مطيرتهالك السياسة كيفي فما حاجات

يرجعولك شاهد العقل كيما هكا ...
إذا من غير ما نطول عليك ، أختي المواطنة أنسجي على منوال الأخت الفاضلة ، أخي المواطن ، برا قيد سينون برا عدي!

15 جويلية 2011

ليوم ستة شهر على هروب بن علي وبداية سقوط جزء من نظامو ، مشيت بش نقيد في قائمة الناخبين ، باش في أكتوبر (كان سهل ربي) نمارس حقي أول مرة.
هزيت معايا الوالدة اللي عمرها ما انتخبت قبل ومشينا قيدنا .. الحكاية ما شدتناش درج بالحساب ، خلافا للأكاذيب (واللى الله أعلم شنية) الموجودة في الفايسبوك بكثرة.
 

 ليوم زادة صادف فما إعتصام في القصبة ، اللي يقولولو القصبة ثلاثة ، واللي مانيش معاه ومانيش مساندو ونعتبرو خصوصا يخدم مصالح حزب النهضة السلفي الطامع في الكراسي ، في المطلب الأول متاعو.
 بالنسبة للمطالب الأخرين فيهم اللي ياسر مثاليين وشعبويين، وخاصة لازمهم وقت طويل ياسر باش يتحققو موش متع واحد يعتصم ويقعد يستنى حتى يجيوه .  كيما "إستقلالية القضاء  واللا " لا ...لوصاية أجنبية"
على كل ، العباد عندهم ألحق يدافعو على أرائهم وعندهم ألحق حتى يدافعو على احزابهم كان لزم وواللا جيست يعاندو في الريق متاع المصاروة زادة كيف كيف عندهم ألحق ...

حليت الفايسبوك وكي العادة نلقى الدنيا خايضة : هاو ضربوهم بالغاز ... هاو هربو تخباو
في الجامع ... هاو خلطو عليهم غادي وفشخوهم ... إلخ
بالطبيعة اللي صار ماهوش مفاجأة ، تي هو مطلب من مطالب الإعتصام "إقالة وزير الداخلية " ...حاجة متوقعة باش نشوفو نفس ممارسات ها المنظمة البوليسية اللي من أكثر المنظمات شراسة وخبرة في القمع في العالم ... الشيء موش باش يتبدل في ليلة وضحاها وخاصة مع إنعدام الرغبة السياسية واللى القدرة على التغيير ...
،وعلى ذكر الجامع، البوليس التونسي  لا دين لا ملة ، لا يهمو في جامع ولا طبرنة ولا حانوت كفتاجي ...الكل على بعضو ... إذا زايد باش الواحد يستثمر حكاية الجامع للتأثير .. المسألة  قبل كل شي"  "مسألة "حرمة جسد" قبل ما تكون حرمة مسجد "

في الأخر حبيت نقول اللي آنا ديما ضد ها الإعتصام خاصة وأني نفضل نضرب ضربتي  نهار 23 أكتوبر ... ومانيش باش نبدل رايي للتعاطف ... ولكني مستعد ولازمني  نتظاهر بش يفرجو عاللي شدوهم بمجرد أنهم عبرو على رايهم و ضد ها البولسية الهوايش ووزيرهم اللي حاسين رواحهم في موقع قوة وقاعدين كل  مرة يزيدو في تطيح القدر. 

Free Samir feriani

قالك فما بوليس ، اسمو سمير الفرياني ... 

مللي بدات الثورة وهو يدور من سطح لسطح بكلاشنكوف ويقمر عالمتضاهرين ...

وزيد ها السيد توا عندو يجي 15 سنة إستغنى فرد ضربة ، شركات وكونتوات في بونوك عالمية وكراهب بالبركون والبيسين ،تي حتى تلفونك متاعو.  

وصل حتى يعمل صفقات متع سلاح ... مالا وينك ؟

وكانو عندو برشة جمعيات عاملهم، ويلم بيهم في الفلوس بطرق مشبوهة ، أباء تونس مثلا..

مبعد كي هرب بن علي ضياقت بيه الدنيا، دورها اندساس وعروشات وجو ! 

وزيد شاكك فيه وراء حكاية الروحية .. 

تي في الأيامات الأخيرة وهو في الحبس -بفضل هيبة الدولة- هو ألي حرك الجموع اللي باللحيا بش يكسر صالة افريكا ... فمتا كيفاش ؟

ومؤخرا سمعت بيه حب يعمل حزب وعندو تمويلات مشبوهة...

أيا الحمد الله كي هذاكة هو حد الباس وهو توا تشد وجونا باهي .. سينون راهو عمل برشة ضحايا اخرين !

سيب سمير ! على خاطر حرية التعبير ما تقتلش

ثورة وذني وحرية وذني !

البوست هاذا فيه برشة كلام ماسط ولذا كان ما تحملش واللا حسيت روحك تمسيت في مقدساتك ، موش لازم تغشش روحك وإشرب كاس ماء مسكج وأخرج شم الهواء.

عندي مدة وآنا دمي يغلي ، ونقول، لا ميسالش ... ماهي إلا هوجة وتتعدى ... تي ريق مفرخ وبرة ... تي شوية إسهال متع بهامة وسوء هضم للثورة ويتعدى .. لاباس!

آش من لاباس يا عم صالح !!! ثورة ثورة ثورة !...
 ثورة وذني !
يا بالحرام بديت نندم عالياللي اللي عديتهم نكتب عالحجب ونظام بن خرا عقاب الليل ،ومبعد نمشي نمرقد في الدرس !! ، وعالنهار اللي خرجت فيه نتظاهر! والسوايع اللي ما دخلتش فيهم نقرا باش نمشي لإعتصام وذني ونطالب "بحقي" وحق غيري  باش يحل فمو ويعيش كإنسان !

بلكشي كسرت راسي وسهرت وتضربت وبكيت وبت خايف لا يجيو يكرفتو *** على خاطر كتبت في عقاب صفحة واللا بلوغ بش مبعد نرجعو أخيب مللي كنا !! باش مبعد يجي حزب وواللا واحد مكمل، عندو سنين ما تجرئش باش يحط ساقو في تونس،  ويحل  في دين أم فمو ويقول ساهمت في الثورة

 واللا لاخر يقلك ضربوني وظلموني و****ني... وثورة الشباب... ونترحم على الشهداء ...ونحب حقي، آش من ثورة وآش من شباب متع وذني ؟؟
واللا لاخر عمرو آش وثمانين ويطل مرة في الفال ويبدا يفصص و-"بحيث" و-"جيبولي القناصة" و-"كعو بن بعو"

آش ها السرك اللي حليتوه في جد أم البلاد !!!
 وحدة متروشة عملت فيلم تزمر وحدها ، جاو كمشة خلايق بهايم وعملين فيها صيودة بو قلادة وجموع شادين الميضة توا 50 سنة ولا واحد فيهم حل فمو وتوا ولالي مدافع عالهوية وعلى دين امو وأمي ! وولاتلي قضية الشرق الأوسط ! خمجتوها بالتفاهة!!

وجموع تكفّر من غادي وتسب في عباد أشرف من مناظرهم الحرف بألفين مرة !
من غير ما نحكي عاد على أصوات الحمقى اللي طلعت كي الفقاع ضربة وحدة !

بلكشي ثورة "بلع فمك آنا بش نشد الكرسي" هاذي ؟ وللى ثورة "هيا نبدلو لون الدكتاترية"؟ قالوا تطبيع وأسلامية وشريعة وهوية عربية ومقدسات وبورنو وهيبة الدولة ومحكمة عسكرية ! تي تررت روح !! ما إتفهمكم والله لا تحشمو !

راهي حرية !

liberté !

freedom!

Libertààà!

واللا تسخايلو بلحق وليتو في حرية جاء وقت بش تحشو منها شوية ؟؟ تي الحرية اللي حاسبينها عندكم هشة كي الورقة،
 عايشين في وهم تسبو في بن علي وليلى وفي جثة التجمع والأحزاب ألي ما عندها حتى سلطة !

نهار ألي تخلط على الفرياني تو تفهم !
هاذي غلطة العباد اللي بلحق ساهمو في ها التحرك من غير ما يغزرو للقدام وما خممو كان في عملية الهدم !


هاذي غلطة العباد اللي بلحق عطاو الغالي والنفيس للحرية ... نقولها ونعاودها ، للحرية ! موش لخدمة أديولوجية واللا عقيدة واللا توجه ! ومبعد ما طلبوش الكلمة والمناصب على خاطرهم أرفع من هكا !


لحاجة اللي تخوف وتنرفز اللي نسبة موش قليلة من ها الشعب "جوسكوبوتيست" للسماء ! وكيما تشوفو اليوم عامل القهر بالثورجية والدفاع على الأشباح متاعو ، نهار آخر تلقاه خانس كي الحجلة أكثر مللي كان!

يا بالحرام كان ما تصيرش معجزة ها الثورة لا تسواها مليم وما سلكوها كان شهداء الوطن  !

كلام ... عالفجاري

مانيش شاعر ، وما تعلمتش نلعب بالكلمات ...
 لا نعرف نغني ولا نفسر الحلمات ...
 أما نحب نحكيلك...
 نتكلم كيما جات ؟...
 نكتبلك شعر؟  نصورلك آش ريت في المنامة ؟
 نغنيلك؟..

نحكيلك على لون السماء كيف تذكرني بعينيك ؟ ..


نحب نوصفلك ريحة مسك الليل اللي معنقتني
ونعاودلك هدرة النسمة اللي مونستني

علاش الدموع ؟
 قلي شكون يحب يبكيك

تشوف في الشمس اللي طلعت ؟
نقللها تمسحلك الدموع على خدك ؟

تشوف في الموجة في البحر ؟
تسمع في كلامها مع الحجر ؟

سمعتها قالتلو نحبك ؟

نحب نهدي حديثها ليك ...